बहुप्राविधिक शिक्षालय हटाउने निर्णयविरुद्ध स्थानीयको विरोध

काभ्रे : काभ्रेको बनेपास्थित बनेपा बहुप्राविधिक शिक्षालयको भवन र जग्गा नगरपालिका मातहत ल्याएर त्यहाँ नगर कार्यपालिका कार्यालय सञ्चालन गर्ने निर्णयप्रति स्थानीय तहमा तीव्र असन्तोष देखिएको छ। नगरसभाबाट पारित निर्णय कार्यान्वयनतर्फ उन्मुख भइरहँदा विद्यार्थी, अभिभावक र स्थानीयवासीले भने प्राविधिक शिक्षालय विस्थापित गर्ने कदम दीर्घकालीन रूपमा हानिकारक हुने चेतावनी दिएका छन्।

बनेपा नगरसभाको २०८२ पुस ३० गते बसेको १७औँ अधिवेशनले वडा नं। ५ मा सञ्चालनमा रहेको शिक्षालयको भवन तथा सम्पूर्ण जग्गा नगरपालिका मातहत ल्याउने विशेष प्रस्ताव सर्वसम्मतिले पारित गरेको थियो। निर्णयअनुसार आगामी शैक्षिक सत्रदेखि शिक्षालयका पठनपाठन कार्यक्रम वैकल्पिक स्थानमा सार्ने व्यवस्था मिलाई हाल प्रयोग भइरहेको स्थान खाली गर्न शिक्षालय प्रशासनलाई पत्राचारसमेत गरिएको छ। उक्त पत्र नगर प्रमुख शान्ति रत्न शाक्यले हस्ताक्षर गरेका छन्।

नगरपालिकाको निर्णय सार्वजनिक भएसँगै स्थानीय बासिन्दा, विद्यार्थी, अभिभावक तथा सरोकारवालाहरूले आपत्ति जनाएका छन्। उनीहरूले प्रविधिक शिक्षा रोजगारीमुखी र सीपमूलक जनशक्ति उत्पादनका लागि अत्यावश्यक रहेको उल्लेख गर्दै सञ्चालनमा रहेको शिक्षालयलाई हटाउने निर्णय अविवेकी भएको बताएका छन्।

स्थानीयहरूको भनाइमा प्राविधिक शिक्षाले युवालाई आत्मनिर्भर बनाउने आधार तयार पारिरहेको अवस्थामा पूर्वाधारसहित सञ्चालनमा रहेको संस्थालाई अन्यत्र सार्नु शिक्षा क्षेत्रमै नकारात्मक सन्देश दिने कदम हुनेछ।

यस विषयले सामाजिक सञ्जालमा समेत व्यापक बहस सिर्जना गरेको छ। धेरै प्रयोगकर्ताले निर्णय पुनर्विचार गर्न नगरपालिकासँग माग गरेका छन्।

यद्यपि, शिक्षालयको स्थानान्तरण र नगर कार्यपालिका कार्यालय सञ्चालनबारे नगरपालिकाको विस्तृत आधिकारिक धारणा सार्वजनिक हुन बाँकी छ।