जातीय छुवाछूत उन्मूलनमा धार्मिक क्षेत्रको भूमिका

काठमाडौँ : जातीय छुवाछूत उन्मूलनमा धार्मिक क्षेत्रको भूमिका विषयक अन्तरक्रिया काठमाडौँमा सम्पन्न भएको छ। राष्ट्रिय दलित आयोगका अध्यक्ष देवराज विश्वकर्माको प्रमुख आतिथ्यतामा कागेश्वरीस्थित नेपाल चर्खा प्रचारक गान्धी तुलसी स्मारक महागुठीमा कार्यक्रम आयोजना गरिएको हो। कार्यक्रममा कोषाध्यक्ष तथा अनुसन्धानकर्ता केशवप्रसाद चौलागाईंले छुवाछूत अन्त्यका लागि संस्थाले गर्दै आएका गतिविधिबारे प्रस्तुति दिएका थिए।

संस्कृतिविद् घनश्याम कोइराला, प्रणिल नेपाली, राष्ट्रिय स्वतन्त्र पार्टीका नगर अध्यक्ष राजकुमार नेउपाने, विश्व हिन्दु परिषद नेपालका नगर अध्यक्ष टंक खतिवडा र राजनीतिक विश्लेषक कुमार पौडेललगायत वक्ताले जातीय विभेदको अवस्थाबारे चर्चा गर्दै यसको अन्त्यका लागि सामूहिक पहल आवश्यक रहेको धारणा राखे।

कार्यक्रमको अन्त्यमा पाँच बुँदे प्रतिबद्धता पत्रमा हस्ताक्षर गर्दै सहभागीहरूले छुवाछूत उन्मूलनका लागि सक्रिय रूपमा लाग्ने प्रतिबद्धता जनाएका छन्।