आज २५७०औँ बुद्ध जयन्ती मनाइँदै

काठमाडौँ : विश्व शान्तिका सन्देशवाहक सिद्धार्थ गौतमको २५७०औँ जयन्ती आज देशभर विभिन्न कार्यक्रम गरी मनाइँदैछ।

वैशाख शुक्ल पूर्णिमाका दिन मनाइने बुद्ध जयन्ती बुद्धको जन्म, ज्ञान प्राप्ति र महापरिनिर्वाण तीनै घटनासँग जोडिएकाले विशेष महत्व राख्छ। यही दिनको स्मरणमा नेपालसहित विश्वभरका बौद्ध धर्मावलम्बीले श्रद्धा र भक्तिपूर्वक यो पर्व मनाउने परम्परा छ ।

शान्ति, अहिंसा र मैत्रीका प्रवर्तकका रूपमा चिनिने गौतम बुद्धलाई हिन्दू धर्ममा भगवान् विष्णुको नवौँ अवतारका रूपमा पनि मानिन्छ। ‘अहिंसा नै शान्ति र मैत्रीको आधारशिला हो’ भन्ने उनका सन्देश आज पनि उत्तिकै सान्दर्भिक मानिन्छन्।

बुद्ध जयन्तीका अवसरमा देशभरका चैत्य, गुम्बा र विहारमा पूजा–आराधना गरिन्छ। विशेषगरी लुम्बिनी, स्वयम्भू र बौद्ध क्षेत्रमा लामा तथा बौद्ध गुरुहरूको उपस्थितिमा धार्मिक विधि सम्पन्न गरिनुका साथै विविध सांस्कृतिक कार्यक्रम आयोजना गरिन्छ।

इसापूर्व ५६३ मा रुपन्देहीको लुम्बिनीमा राजा शुद्धोधन र रानी मायादेवीको पुत्रका रूपमा जन्मिएका सिद्धार्थ गौतमले मानव जीवनका दुःखबाट मुक्ति खोज्दै २९ वर्षको उमेरमा राजदरबार त्यागेका थिए।