भारतीय अवरोधविरुद्ध चिया उद्योगी आन्दोलित, भोलिदेखि उद्योग र बगान बन्द

भद्रपुर :  भारतीय चिया बोर्डले लागू गरेको नयाँ ‘स्ट्यान्डर्ड अपरेटिङ प्रोसेजर’ (एसओपी) का कारण नेपाली चियाको निर्यात प्रभावित भएपछि चिया उद्योगीहरूले असार ४ गतेदेखि अनिश्चितकालका लागि चिया उद्योग र बगान बन्द गर्ने घोषणा गरेका छन्।

नेपाल चिया उत्पादक सङ्घ झापाले भद्रपुरमा पत्रकार सम्मेलन गर्दै भारतीय पक्षको नीतिका कारण नेपाली चिया उद्योग गम्भीर सङ्कटमा परेको जनाएको हो। सङ्घका महासचिव शुक्र दाहालका अनुसार नेपालमा उत्पादित सिटिसी र अर्थोडक्स चियाको वार्षिक कारोबार १२ देखि १४ अर्ब रुपैयाँको छ, जसमध्ये करिब ५ अर्ब रुपैयाँ बराबरको चिया भारत निर्यात हुने गरेको छ।

उद्योगीहरूले भारततर्फको निर्यात अवरुद्ध हुँदा उत्पादित चिया बजारविहीन बनेको र उद्योग सञ्चालन नै कठिन अवस्थामा पुगेको बताएका छन्। उनीहरूले बङ्गलादेश, पाकिस्तानलगायत तेस्रो मुलुकमा निर्यात विस्तारका लागि सरकारले कूटनीतिक र व्यापारिक पहल गर्नुपर्ने माग गरेका छन्।

चिया क्षेत्रले देशभर करिब ६० हजार श्रमिक तथा कर्मचारीलाई रोजगारी दिँदै आएको छ भने वार्षिक करिब १ अर्ब रुपैयाँ राजस्व योगदान गर्दै आएको उद्योगीहरूको भनाइ छ।