रवि लामिछाने पुनः रास्वपाको नेतृत्वमा निर्विरोध

चितवन : चितवनमा जारी राष्ट्रिय स्वतन्त्र पार्टी (रास्वपा) को पहिलो महाधिवेशनबाट रवि लामिछाने सभापतिमा निर्विरोध निर्वाचित भएका छन्। नेतृत्व चयनका लागि उम्मेदवारी दर्ता सम्पन्न हुँदा सभापति पदमा लामिछानेको मात्र उम्मेदवारी परेपछि निर्वाचन आयोगले उनलाई निर्विरोध निर्वाचित घोषणा गरेको हो।

रास्वपा केन्द्रीय निर्वाचन आयोगका प्रमुख भुवन केसीका अनुसार लामिछानेको उम्मेदवारीमा वरिष्ठ नेता बालेन्द्र शाह प्रस्तावक रहेका थिए। सभापति पदमा अन्य कुनै दाबी नपरेपछि निर्वाचन प्रक्रियाबिनै उनी पुनः पार्टी नेतृत्वमा स्थापित भएका हुन्।

महाधिवेशनअन्तर्गत केन्द्रीय सदस्य पदका लागि भने उम्मेदवारी दर्ता प्रक्रिया जारी रहेको आयोगले जनाएको छ। केसीका अनुसार केन्द्रीय सदस्यहरूको उम्मेदवारी दर्ता राति १२ बजेसम्म खुला रहनेछ। उम्मेदवारको अन्तिम सूची प्रकाशनपछि प्रतिनिधिहरूले भोलि बिहान ८ बजेदेखि मतदान गर्ने कार्यक्रम तय गरिएको छ।

रास्वपाको पहिलो महाधिवेशनले नयाँ नेतृत्व चयनसँगै आगामी राजनीतिक कार्यदिशा र संगठन विस्तारका विषयमा समेत महत्वपूर्ण निर्णय गर्ने अपेक्षा गरिएको छ।