जनप्रतिनिधि र कर्मचारी नङमासु जस्तै : मरासिनी

बनेपा :  धुलिखेल नगरपालिकाका प्रमुख प्रशासकीय अधिकृत मोहनप्रसाद मरासिनीले स्थानीय तहमा जनप्रतिनिधि र कर्मचारीबीचको सम्बन्ध नङ र मासुको जस्तै परिपूरक हुनुपर्ने बताएका छन्। मुलुकका कतिपय पालिकामा दुई पक्षबीच विवाद बढिरहेका बेला धुलिखेलको अनुभव भने सकारात्मक रहेको उनले उल्लेख गरे।

‘कर्मचारी वास्तवमा सरकारको मुटु हुन्’ मरासिनीले भने -‘जनप्रतिनिधि मात्र बसेर वा कर्मचारी मात्र दौडिएर विकास सम्भव छैन, दुवैको भूमिका उत्तिकै महत्त्वपूर्ण हुन्छ ‘। जनताबाट निर्वाचित जनप्रतिनिधिमा जनभावना अनुसार द्रुत गतिमा काम गर्ने चाहना हुने तर कर्मचारीले सधैं कानुनी प्रक्रियालाई प्राथमिकता दिने उनले स्पष्ट पारे।

कहिलेकाहीँ कामको सिलसिलामा सामान्य मतभेद वा ‘ठ्याकठुक’ हुनु स्वाभाविक भए पनि धुलिखेलमा त्यसले दीर्घकालीन रूपमा सम्बन्ध नबिगारेको उनले प्रस्ट पारे। अख्तियार, सतर्कता केन्द्र र महालेखा परीक्षक जस्ता नियमनकारी निकायहरू सक्रिय रहने भएकाले आफूहरू सधैं सुरक्षित र कानुनी दायराभित्रै रहेर काम गर्न प्रतिबद्ध रहेको मरासिनीले बताए।