मनसुन सक्रिय, चार प्रदेशमा भारी वर्षाको सम्भावना

काठमाडौँ :  मनसुन थप सक्रिय बन्दै जाँदा देशका विभिन्न क्षेत्रमा वर्षाको क्रम जारी रहने भएको छ। जल तथा मौसम पूर्वानुमान महाशाखाले कोशी, बागमती, गण्डकी र लुम्बिनी प्रदेशका पहाडी तथा तराईका एकरदुई स्थानमा आज भारी वर्षाको सम्भावना रहेको भन्दै आवश्यक सतर्कता अपनाउन आग्रह गरेको छ।

हाल देशभर सामान्यदेखि पूर्ण बदली रहेको छ भने बागमती, कोशी र लुम्बिनी प्रदेशका केही स्थानमा मेघगर्जन र चट्याङसहित मध्यम वर्षा भइरहेको महाशाखाले जनाएको छ। दिउँसो र राति पनि अधिकांश स्थानमा बदली रहने तथा पहाडी र तराई क्षेत्रका केही स्थानमा मेघगर्जन, चट्याङसहित मध्यम वर्षा हुने सम्भावना छ। उच्च हिमाली क्षेत्रका केही स्थानमा हिमपातसमेत हुन सक्ने अनुमान गरिएको छ।

पछिल्लो १२ घण्टामा पहाडी क्षेत्रमा उल्लेख्य वर्षा भएको छ। जल तथा मौसम विज्ञान विभागका अनुसार सबैभन्दा धेरै वर्षा सिन्धुपाल्चोकमा ९८ मिलिमिटर मापन गरिएको छ। कर्णाली र सुदूरपश्चिमका केही जिल्लामा अहिले पनि हल्कादेखि मध्यम वर्षा भइरहेको छ। यसअघि काठमाडौं उपत्यकामा परेको वर्षाका कारण डुबान भई जनजीवन प्रभावित भएको थियो।