काभ्रेपलाञ्चोकमा विपद् व्यवस्थापनका जिम्मेवार निकायबीच सूचना आदानप्रदान र समन्वय कमजोर हुँदा उद्धार तथा उपचार प्रभावित हुन सक्ने भन्दै त्यसलाई सुधार्न जोड दिइएको छ।
जिल्ला जनस्वास्थ्य कार्यालयले मंगलबार धुलिखेलमा आयोजना गरेको विपद् पूर्वतयारी तथा प्रतिकार्य योजनासम्बन्धी समन्वयात्मक बैठकमा सहभागीहरूले जिल्लाका पाँच स्थानीय तह उच्च विपद् जोखिममा रहेकाले पूर्वतयारीलाई व्यवहारमै प्रभावकारी बनाउनुपर्ने बताएका हुन्।
प्रमुख जिल्ला अधिकारी गोपालकुमार अधिकारीले विपद्का बेला कुनै पनि जिम्मेवार निकायले ‘मलाई थाहा भएन’ भन्ने अवस्था आउन नदिन सूचना प्रणालीलाई चुस्त बनाउनुपर्ने बताए। जिल्ला समन्वय समिति प्रमुख दीपक गौतमले उद्धारमा खटिने टोली ढिलो पुग्दा घाइतेको उपचार प्रभावित हुने भएकाले सबै निकाय तयारी अवस्थामा रहनुपर्ने धारणा राखे।
बैठकमा स्थानीय तह, अस्पताल, नेपाल रेडक्रस, स्वास्थ्यकर्मी तथा अन्य सरोकारवालाले स्रोत-साधन, जनशक्ति र स्वास्थ्य सेवाको तयारीलाई अझ प्रभावकारी बनाउने विषयमा छलफल गरेका थिए। जिल्ला जनस्वास्थ्य कार्यालय प्रमुख रागिश्री कक्षपति श्रेष्ठले विपद् व्यवस्थापन सरकारको मात्र नभई सबै नागरिकको साझा दायित्व भएको बताइन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |