छोरासँगको विवादपछि बुद्धनगरमा पुरुषको आत्मदाह प्रयास

काठमाडौँ : आफ्नै छोरासँगको पारिवारिक विवादपछि काठमाडौँको बुद्धनगरमा एक पुरुषले शनिबार बिहान आत्मदाहको प्रयास गरेका छन्। गम्भीर रूपमा जलेका उनको वीर अस्पतालमा उपचार भइरहेको प्रहरीले जनाएको छ।

जिल्ला प्रहरी परिसर काठमाडौँका अनुसार काठमाडौँ महानगरपालिका-१० बुद्धनगरस्थित डेरामा बस्दै आएका ४५ वर्षीय अश्विन राउतले बिहान आफ्नै शरीरमा आगो लगाएका हुन्। प्रहरीका अनुसार छोरासँग विवाद भएपछि उनी भान्सामा गएर आत्मदाहको प्रयास गरेका थिए।

घटनापछि स्थानीय र प्रहरीले तत्काल उद्धार गरी राउतलाई उपचारका लागि वीर अस्पताल पुर्‍याएका थिए। अस्पतालका चिकित्सकले उनको शरीरको करिब ५५ प्रतिशत भाग जलेको बताएका छन्। उनको अवस्था गम्भीर रहे पनि उपचार जारी रहेको प्रहरीले जनाएको छ।

घटनाबारे थप अनुसन्धान भइरहेको जिल्ला प्रहरी परिसर काठमाडौँका एसपी पवन भट्टराईले जानकारी दिए । प्रारम्भिक अनुसन्धानका क्रममा आत्मदाहको प्रयास पारिवारिक विवादसँग जोडिएको देखिए पनि घटनाका सबै पक्षबारे प्रहरीले विस्तृत अनुसन्धान अघि बढाएको जनाएको छ।