तीन दिन भारी वर्षाको सम्भावना, उच्च सतर्कता अपनाउन आग्रह

काठमाडौँ :  मनसुन थप सक्रिय हुने संकेतसँगै जल तथा मौसम विज्ञान विभागले आगामी तीन दिन देशका विभिन्न भूभागमा भारीदेखि अति भारी वर्षा हुन सक्ने भन्दै बाढी, पहिरो र डुबानको जोखिमप्रति उच्च सतर्कता अपनाउन आग्रह गरेको छ।

विभागका अनुसार हाल देशभर मनसुनी वायुको प्रभाव कायम छ भने मनसुनको न्यूनचापीय रेखा पश्चिमतर्फ औसत स्थानभन्दा केही उत्तर र पूर्वतर्फ औसत स्थानकै आसपास रहेकाले उल्लेख्य वर्षाको सम्भावना रहेको छ। शुक्रबार कोशी, बागमती, गण्डकी र लुम्बिनी प्रदेशका पहाडी तथा तराईका केही स्थानमा भारी तथा एक-दुई स्थानमा धेरै भारी वर्षा हुन सक्ने पूर्वानुमान गरिएको छ। कर्णाली र सुदूरपश्चिमका केही स्थानमा पनि भारी वर्षाको सम्भावना रहेको विभागले जनाएको छ।

वर्षासँगै गेग्रान बहाव, बाढी, पहिरो र भूक्षयको जोखिम बढ्न सक्ने भएकाले प्रभावित क्षेत्रमा विशेष सावधानी अपनाउन विभागले आग्रह गरेको छ। वर्षाले सडक तथा हवाई यातायात, कृषि, पर्यटन र दैनिक जनजीवन प्रभावित हुन सक्ने जनाउँदै विभागले मौसमसम्बन्धी अद्यावधिक सूचना नियमित रूपमा पछ्याउन अनुरोध गरेको छ।