काठमाडौँ : शिक्षक पेसाको मानमर्दन गरेको आरोप लागेपछि निर्माणाधीन चलचित्र ‘मास्टर्नी’को प्रमोशनल गीत हटाइएको छ। विवाद चुलिएपछि अभिनेत्री तथा निर्मात्री प्रियङ्का कार्की र गायक दुर्गेश थापाले सार्वजनिक रूपमा माफी माग्दै गीत युट्युबसहित सबै डिजिटल प्लेटफर्मबाट हटाएको बताएका छन्।
गीतमा प्रयोग भएका शब्द र दृश्यले शिक्षकको गरिमामाथि आँच पुर्याएको भन्दै नेपाल शिक्षक महासंघसहित विभिन्न पक्षबाट विरोध भएपछि दुवैले सामाजिक सञ्जालमार्फत धारणा सार्वजनिक गरेका हुन्।
प्रियङ्काले उक्त गीत चलचित्रको कथावस्तुको हिस्सा नभई प्रचारप्रसारका लागि मात्रै तयार गरिएको स्पष्ट पार्दै कसैको आस्था वा सम्मानमा ठेस पुर्याउने उद्देश्य नरहेको बताएकी छन्। उनले अन्जानमा भएको त्रुटिप्रति सम्पूर्ण शिक्षक समुदायसँग क्षमायाचना गर्दै भविष्यमा विषयवस्तु छनोटमा थप संवेदनशील रहने प्रतिबद्धता व्यक्त गरेकी छन्।
गायक दुर्गेश थापाले पनि गीतका शब्द र प्रस्तुतीकरणले शिक्षक तथा दर्शकको भावनामा चोट पुगेको स्वीकार गर्दै आलोचना र सुझावलाई आत्मसात् गरेर आफ्नो युट्युब च्यानलबाट गीत हटाइसकेको बताएका छन्। शिक्षक समाजका मार्गदर्शक र सम्मानित व्यक्तित्व भएको उल्लेख गर्दै उनले आगामी सिर्जनामा थप जिम्मेवार रहने प्रतिबद्धता जनाएका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |