इरानमाथि अमेरिकाको लगातार नवौँ हवाई आक्रमण

काठमाडौँ :  अमेरिकाले इरानमाथि लगातार नवौँ रात व्यापक हवाई आक्रमण गरेको छ। अमेरिकी सेनाको सेन्ट्रल कमाण्ड (सेन्टकम)ले हर्मुज जलमार्ग हुँदै सञ्चालन हुने अन्तर्राष्ट्रिय व्यापारिक जहाजको सुरक्षामा इरानबाट उत्पन्न हुन सक्ने जोखिम कम गर्न आक्रमण गरिएको जनाएको छ।

इरानी सञ्चारमाध्यमका अनुसार अमेरिकाले निर्माणाधीन डार्खोभिन आणविक ऊर्जा केन्द्र आसपासका क्षेत्रमा दर्जनौँ क्षेप्यास्त्र प्रहार गरेको छ। साथै, समुद्री नाकाबन्दी कडा बनाउँदै अमेरिकी सेनाले छ वटा व्यापारिक जहाजको मार्ग परिवर्तन गराएको र एउटा जहाजलाई निष्क्रिय पारेको दाबी गरिएको छ।

यता, उत्तरी इराकमा खसालिएको इरानी ड्रोनको बम निष्क्रिय पार्ने क्रममा भएको विस्फोटमा एक अमेरिकी सैनिकको मृत्यु भएको छ। यससँगै इरानसँगको जारी द्वन्द्वमा ज्यान गुमाउने अमेरिकी सैनिकको संख्या १७ पुगेको छ।

कूटनीतिक प्रयास निष्कर्षविहीन बनेपछि दुवै पक्षबीचको सैन्य आक्रमण झन् चर्किएको छ। यसले पश्चिम एसियामा सुरक्षा चुनौती थप गहिरिँदै युद्धको जोखिम बढाएको छ।