काठमाडौँ : प्रदर्शनकारी र प्रहरीबीचको झडपमा एक युवकको मृत्यु भएपछि स्थिति नियन्त्रणबाहिर जान नदिन जिल्ला प्रशासन कार्यालय सुनसरीले पूर्व-पश्चिम राजमार्ग क्षेत्रमा पनि अनिश्चितकालीन कर्फ्यू आदेश जारी गरेको छ। देवानगन्ज र हरिनगरा क्षेत्रमा जारी कर्फ्यूका बाबजुद प्रदर्शन उग्र बनेपछि प्रशासनले सोमबार राति ९ बजेदेखि लागू हुने गरी राजमार्ग क्षेत्रमा कर्फ्यू विस्तार गरेको हो।
आइतबार राति कप्तानगन्जमा भएको झडपका क्रममा प्रहरीको गोली लागेर देवानगन्जका ओमप्रकाश मेहताको मृत्यु भएको थियो। उक्त घटनापछि आक्रोशित स्थानीयले सोमबार दिनभर लौकही, भोक्राहा र इनरुवा खण्डमा टायर बालेर प्रदर्शन गर्नुका साथै पूर्व–पश्चिम राजमार्ग अवरुद्ध पारेका थिए।
राजमार्गको सुरक्षा र सार्वजनिक सम्पत्तिको रक्षाका लागि पूर्वमा इनरुवा नगरपालिका ३ र ६ को सीमा ९घोपली टोल०, पश्चिममा कोशी ब्यारेजको पुल तथा राजमार्गको उत्तर–दक्षिण ५ सय मिटरसम्म कर्फ्यू लगाइएको प्रशासनले जनाएको छ। यसअघि देवानगन्ज र हरिनगराका ५ वटा मुख्य बजार क्षेत्रमा मात्र कर्फ्यू लगाइएको थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |