बनेपा : मुख्य बाली लगाउने सिजनमा प्रायः रासायनिक मलको हाहाकार हुने गरेको काभेपलाञ्चोक जिल्लामा साउनको चालु आर्थिक वर्षको तेस्रो सातामै करिव साढे ३७ हजार बोरा मल बिक्री भएको छ । काभ्रेको धुलिखेलस्थित कृषि सामग्री कम्पनीले भने साउनको २० दिनमै ३७ हजार ४१७ बोरा मल बिक्री गरेको जनाएको हो ।
कार्यालयका अनुसार यस अवधिमा २४ हजार ५१० बोरा युरिया, ११ हजार ९२८ बोरा डीएपी र ९७९ बोरा पोटास कृषकसम्म पुगिसकेको छ। हाल गोदाममा युरिया, डीएपी र पोटास गरी थप २ हजार ४ बोरा मल मौज्दात रहेकाले अभाव नहुने र नजिकैका सहकारीबाट सहजै खरिद गर्न सकिने कम्पनीको दाबी छ।
धुलिखेल शाखाले काभ्रे, सिन्धुपाल्चोक, दोलखा र रामेछापमा मल आपूर्ति गर्दै आएको छ। शाखा प्रमुख आलोककुमार शर्माका अनुसार गत आर्थिक वर्षमा यी चार जिल्लामा कुल ११ हजार ६६८।७ मेट्रिक टन अनुदानको मल खपत भएको थियो, जसमध्ये काभ्रेमा मात्रै सबैभन्दा बढी ८ हजार ५७ मेट्रिक टन मल बिक्री भएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |