काठमाडौँ : भीषण बाढीको वितण्डापछि त्रिशूली र नारायणी नदी तटीय क्षेत्रमा शव भेटिने क्रम रोकिएको छैन। प्रहरीका अनुसार रसुवा बाढीका कारण ज्यान गुमाएकामध्ये हालसम्म ५ सय ५३ जनाको शव फेला परेको छ।
नदीले बगाएका शवहरू तल्लो तटीय क्षेत्र चितवनमा सबैभन्दा बढी २ सय २२ वटा र नवलपरासी पूर्वमा १ सय ३४ वटा भेटिएका छन्। यस्तै गोरखामा ४७, धादिङमा ४०, नुवाकोटमा ३८, तनहुँमा ३१, नवलपरासी पश्चिममा २८ र रसुवामा १३ जनाको शव फेला परेको छ।
विपत्मा परेर बेपत्ता भएका २७ जना प्रहरीमध्ये १ जना मृत अवस्थामा भेटिएका छन् भने अन्य २६ जना अझै सम्पर्कविहीन छन्। उद्धार टोलीले रसुवाबाट ५ सय ७२, नुवाकोटबाट ८ सय ९८ र धादिङबाट ३ गरी १ हजार ४ सय ७३ जनाको जीवितै उद्धार गरेको छ। घाइतेमध्ये ९७ जनाको काठमाडौँका विभिन्न अस्पतालमा उपचार भइरहेको छ।
अहिले पनि खोजी तथा उद्धार कार्यका लागि ४ हजार ४ सय ८९ जना प्रहरी टोली प्रभावित क्षेत्रमा प्रत्यक्ष रूपमा खटिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |