नागरिकको गुमेको विश्वास फर्काउने मुख्य ध्येय छ :गगन थापा

काठमाडौँ :  नेपाली कांग्रेसका नवनिर्वाचित सभापति गगनकुमार थापाले पार्टीभित्रको आन्तरिक प्रतिस्पर्धाको अध्याय सकिएको घोषणा गर्दै नागरिकको गुमेको विश्वास पुनः स्थापित गर्नु नै आफ्नो मुख्य प्राथमिकता रहेको बताएका छन् ।

अधिवेशनको प्रक्रिया पूरा भई आफ्नो पक्षमा परिणाम आएपछि आयोजित कार्यक्रममा सम्बोधन गर्दै सभापति थापाले यो विजय व्यक्तिगत नभई नेपाली कांग्रेसलाई रूपान्तरण र नयाँ ढङ्गबाट अगाडि बढाउने सङ्कल्पको विजय भएको दाबी गरे। “यो मेरो व्यक्तिगत विजय होइन, परिवर्तन र नेपाली कांग्रेसलाई नयाँ बनाउने हाम्रो सङ्कल्पप्रतिको विश्वास हो,” थापाले भने, “तपाईँहरूले दिएको विश्वासलाई अधिकार होइन, जिम्मेवारीका रूपमा सम्झेर काम गर्नेछु।”

आफ्नो कार्यकालमा कुनै जादु वा चमत्कारको सस्तो बाचा नगर्ने स्पष्ट पार्दै थापाले इमानदार प्रयत्न, कठिन प्रश्नको सामना र चुनौतीपूर्ण निर्णय लिन पछि नहट्ने प्रतिबद्धता जनाए। पार्टी रूपान्तरणका लागि केवल नेतृत्व परिवर्तन मात्र पर्याप्त नहुने उल्लेख गर्दै उनले पार्टीको सोच, कार्यसंस्कार, निर्णय प्रक्रिया र जवाफदेहिताको शैलीमै व्यापक फेरबदल ल्याउनुपर्नेमा जोड दिए। “सभापति फेरिँदैमा सबै कुरा आफैँ बदलिन्छ भन्ने भ्रममा म छैन । संस्कार, सोच र निर्णय लिने तरिका परिवर्तन गरेर मात्रै पार्टी रूपान्तरण सम्भव छ,” उनले भने।

प्रतिस्पर्धी श्यामकृष्ण खड्गीलगायत पार्टीका सबै पक्ष र विचारलाई समेटेर अघि बढ्ने बताउँदै उनले चुनावको परिणामसँगै पार्टीभित्रको जित हार र गुटबन्दीको अन्त्य हुनुपर्ने बताए। “अधिवेशनको मतगणनासँगै जय र पराजयको कुरा समाप्त हुनुपर्छ। अबको हाम्रो साझा लक्ष्य भनेको नागरिकको विश्वास जित्नु हो,” थापाले भने। अधिवेशन प्रक्रियामा सहभागी भएका तथा छुटेका सबै नेता कार्यकर्तालाई एकताबद्ध बनाएर लैजाने प्रतिबद्धता जनाउँदै थापाले कांग्रेसले अब नागरिक केन्द्रित महाअभियान सञ्चालन गर्ने उद्घोष गरे।