काठमाडौँ : गृहमन्त्री सुदन गुरुङले पदीय दायित्व पन्छाएर राजनीतिक स्वार्थ र नेताको चाकडीमा रमाउने राष्ट्रसेवक कर्मचारीलाई कानुनी दायरामा ल्याई कडा कारबाही गरिने चेतावनी दिएका छन् ।
सामाजिक सञ्जालमार्फत धारणा सार्वजनिक गर्दै गृहमन्त्री गुरुङले जनताको कामभन्दा दलगत आबद्धता वा नेता रिझाउने प्रवृत्तिमा कुनै सम्झौता नगरिने बताएका हुन् । ‘पदीय जिम्मेवारी बिर्सेर जनताको कामभन्दा नेताको चाकडीलाई प्राथमिकता दिने जोकोहीमाथि कानुनबमोजिम कडा कारबाही हुन्छ, यसमा कुनै सम्झौता हुँदैन,’ उनले लेखेका छन् ।
कर्मचारीको मूल धर्म दलको झोला बोक्ने नभई निष्पक्ष रूपमा देश र जनताको सेवा गर्नु रहेको उनको भनाइ छ । नेता र कर्मचारी दुवैको साझा ध्येय राष्ट्र र नागरिकप्रति समर्पित हुनु पर्ने उल्लेख गर्दै उनले भनेका छन्, ‘पटकपटक स्पष्ट पारिसक्दा पनि कसैले अझै दलको झोला बोकेर राजनीति गर्न पाइन्छ भन्ने भ्रम पालेको छ भने त्यो भ्रम आजै त्यागे हुन्छ ।’
जनताको पीडा सम्बोधन गरी इमानदारीपूर्वक कर्तव्य निर्वाह गर्न उनले कर्मचारीहरूलाई आह्वान गरेका छन् ।

हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |