काठमाडौं : तिथिको घटबढका कारण यस वर्ष तिहारका दुई महत्त्वपूर्ण पर्व कुकुरतिहार र लक्ष्मीपूजा आइतबार एकै दिन परेको छ। नेपाल पञ्चाङ्ग निर्णायक विकास समितिको निर्णयअनुसार आइतबार दिउँसो चतुर्दशी र साँझ औँसी तिथि परेकाले बिहान कुकुरको पूजा र साँझ धनधान्यकी देवी लक्ष्मीको आराधना गरी दीपावली मनाइँदै छ।
हिन्दु धार्मिक मान्यताअनुसार कुकुरलाई यमलोकको द्वारपाल तथा यमदूतका रूपमा लिइन्छ। कुकुरको पूजा गर्दा यमराज प्रसन्न हुने र मृत्युको भयबाट मुक्ति मिल्ने विश्वास छ। त्यस्तै, औँसीको रात घरघरमा दीप प्रज्वलन गरी लक्ष्मीको स्वागत गर्ने परम्परा छ। समुद्र मन्थन र बलिराजासँग जोडिएको धार्मिक प्रसङ्गले पनि यस दिनको विशेष महत्त्व दर्शाउँछ।
तिहारको तालिकाअनुसार कात्तिक २३ गते गाईपूजा, २४ गते गोवर्धन पूजा, म्हपूजा तथा नेपाल संवत् ११४७ प्रारम्भ हुनेछ। तिहारको अन्तिम दिन कात्तिक २५ गते भाइटीका मनाइनेछ। त्यस दिन भाइटीकाको उत्तम साइत बिहान ११ बजेर ७ मिनेटमा रहेको समितिले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |