काठमाडौँ : तिहारको लक्ष्मीपूजाका दिन विद्युत्को अधिकतम माग करिब १ हजार ७ सय मेगावाट पुग्ने अनुमानसहित नेपाल विद्युत् प्राधिकरणले विद्युत् आपूर्ति व्यवस्थापनको तयारी तीव्र पारेको छ। मागभन्दा उत्पादन बढी हुने प्रक्षेपण गरिए पनि पर्वका बेला आपूर्ति अवरुद्ध हुन नदिन प्राधिकरणले उत्पादनदेखि वितरण प्रणालीसम्म विशेष निगरानीको व्यवस्था गरेको छ।
प्राधिकरणका अनुसार लक्ष्मीपूजाको साँझ करिब २ हजार ५ सय मेगावाट विद्युत् उत्पादन हुने अनुमान छ। यसअनुसार आन्तरिक माग धान्न पर्याप्त विद्युत् उपलब्ध हुनेछ।
कार्यकारी निर्देशक दीर्घायुकुमार श्रेष्ठको अध्यक्षतामा बसेको वरिष्ठ व्यवस्थापन टोलीको बैठकले तिहार तथा छठमा नियमित र गुणस्तरीय विद्युत् आपूर्ति सुनिश्चित गर्न मातहतका कार्यालयलाई आवश्यक निर्देशन दिएको छ।
प्रणाली सञ्चालन, ग्रिड सञ्चालन तथा वितरण र ग्राहक सेवा निर्देशनालयका प्रमुखहरूसँग पनि भर्चुअल बैठक गरी आपूर्ति व्यवस्थापन र निगरानीबारे समन्वय गरिएको प्राधिकरणले जनाएको छ।
विद्युत् सेवामा समस्या आए तत्काल समाधान गर्न ‘नो लाइट’ सेवाका फोन नियमित उठाउन र प्राविधिक टोलीलाई चौबीसै घण्टा तयारी अवस्थामा राख्न निर्देशन दिइएको छ।
यसैबीच, प्राधिकरणले विद्युत्का उपकरण सुरक्षित रूपमा प्रयोग गर्न र समस्या देखिए दक्ष प्राविधिकबाट मात्रै मर्मत गराउन उपभोक्तालाई आग्रह गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |