काठमाडौं : बचतकर्ताको करिब ६ करोड रुपैयाँ अपचलन गरेको आरोपमा रुपन्देहीको सिद्धार्थनगरस्थित मार्गदर्शन बहुउद्देश्यीय सहकारी संस्थाका अध्यक्ष अशोक केसीलाई प्रहरीले नियन्त्रणमा लिएको छ ।
दोलखाको मेलुङ गाउँपालिका-६ घर भएका ३४ वर्षीय केसीलाई प्रहरीले भक्तपुरबाट नियन्त्रणमा लिएर रुपन्देही लगिएको हो । सहकारीका अध्यक्षसहितका पदाधिकारीविरुद्ध गत २० वैशाख २०८१ मा नै पक्राउ पुर्जी जारी भएको थियो। प्रहरीका अनुसार, केसीले सहकारीमा जम्मा भएको ५ करोड ९० लाख ८४ हजार १६५ रुपैयाँ हिनामिना गरेको आरोप छ।
बचतकर्ताको रकम फिर्ता गर्न नसकेपछि सहकारीका सञ्चालकहरू फरार रहँदै आएका थिए। प्रहरीले उनीहरूको खोजी गरिरहेको थियो। लामो समयको प्रयासपछि अध्यक्ष केसीलाई भक्तपुरबाट पक्राउ गर्न सफल भएको प्रहरीले जनाएको छ। सहकारी ठगीका घटनाहरू पछिल्ला दिनमा बढ्दै गएका छन्। यसअघि पनि विभिन्न सहकारीका सञ्चालकहरू बचतकर्ताको रकम अपचलन गरेको आरोपमा पक्राउ परेका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |