काठमाडौं : जेनजी आन्दोलनका क्रममा ज्यान गुमाएका सहिदहरुको अन्त्येष्टि आज राष्ट्रिय सम्मानका साथ सम्पन्न गरिएको छ। पशुपतिस्थित आर्यघाटमा गृह तथा कानूनमन्त्री ओमप्रकाश अर्याल र ऊर्जा मन्त्री कुलमान घिसिङले राष्ट्रिय झण्डा ओढाएर सरकारको तर्फबाट श्रद्धाञ्जली अर्पण गरेका हुन् ।
मृतकप्रति सम्मानस्वरूप नेपाली सेनासहितका सुरक्षा निकायहरूले सलामी अर्पण गरेका थिए।
यसअघि त्रिवि शिक्षण अस्पताल महाराजगञ्जबाट शवयात्रा चक्रपथ हुँदै आर्यघाटसम्म पुर्याइएको थियो। शवयात्रामा परिवारका सदस्य, आफन्त, आन्दोलनका समर्थक तथा सर्वसाधारणको ठूलो उपस्थिति रहेको थियो।
जेनजी आन्दोलनको क्रममा अहिलेसम्म प्रदर्शनकारी, प्रहरी र सर्वसाधारण गरी ७२ जनाको मृत्यु भएको सरकारी तथ्याङ्कमा जनाइएको छ। घाइतेमध्ये केहीको विभिन्न अस्पतालमा उपचार जारी रहेको छ।
सरकारले जेनजी आन्दोलनमा ज्यान गुमाएकाहरुलाई शहीद घोषणा गर्दै, मृतकका परिवारलाई जनही १५ लाख रुपैयाँ राहत उपलब्ध गराउने निर्णय गरिसकेको छ। साथै, शहीदहरूको अन्त्येष्टि राष्ट्रिय सम्मानका साथ गर्ने र असोज १ गतेलाई राष्ट्रिय शोक दिवसको रूपमा सार्वजनिक बिदा दिने निर्णय गरिएको छ।
