काठमाडौं : नवरात्रको छैटौँ दिन आज भक्तजनले स्कन्दमाताको पूजा–आराधना गरेका छन्। आश्विन शुक्ल पञ्चमीका दिन परे पनि परम्पराअनुसार नवदुर्गामध्येकी पाँचौँ रूप स्कन्दमातालाई नै आराधना गरिन्छ।
पुराणअनुसार स्कन्दकुमार (कार्तिकेय) की माता भएकीले उनी ‘स्कन्दमाता’ नामले परिचित छिन्। गोरो वर्णकी चार हात भएकी स्कन्दमाताको काखमा ६ मुख भएका कुमार विराजमान हुन्छन्। कमलासनमा आसनस्थ भएकी कारण उनलाई पद्मासना पनि भनिन्छ।
नवरात्रभरि भक्तजनले घटस्थापना गरिएको स्थानदेखि शक्तिपीठसम्म पुगेर एक–एक देवीको आराधना गर्ने परम्परा छ। मार्कण्डेय पुराणअन्तर्गत देवीमाहात्म्यमा वर्णित नवदुर्गाः शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी र सिद्धिदात्री हुन्।
महाकाली, महालक्ष्मी र महासरस्वतीरूपिणी शक्तिस्वरूपा भगवतीको नवमीसम्म निरन्तर पूजा–अर्चना गर्ने परम्परा प्रचलित छ।
