विराटनगर : विराटनगरमा भएको मोटरसाइकल दुर्घटनामा कोशी प्रदेशबाट क्रिकेट खेल्दै आएका खेलाडी मिनष थापाको मृत्यु भएको छ।
प्रहरीका अनुसार २७ वर्षीय थापाको आइतबार बिहान भएको दुर्घटनामा मृत्यु भएको हो। विराटनगर–४ स्थित भित्री सडकखण्डमा एयरपोर्ट लाइनबाट गणेश चोकतर्फ जाँदै गर्दा उनले चलाएको प्रदेश १–०२–०४२ प ८००२ नम्बरको मोटरसाइकल अनियन्त्रित भई दुर्घटनामा परेको प्रारम्भिक अनुमान गरिएको छ।
बिहान करिब पौने १ बजे दुर्घटना भएको थियो। दुर्घटनामा गम्भीर घाइते भएका थापालाई उपचारका लागि कोसी अस्पताल लगिएको भए पनि चिकित्सकले उनलाई मृत घोषणा गरेका थिए।
विराटनगर निवासी थापा कोशी प्रदेशको तर्फबाट विभिन्न प्रतियोगितामा क्रिकेट खेल्दै आएका थिए। घटनाबारे थप अनुसन्धान भइरहेको प्रहरीले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |