काठमाडौं : आईसीसी टी–२० विश्वकपको तयारीमा रहेको नेपाली राष्ट्रिय क्रिकेट टिमले आज दोस्रो तथा अन्तिम अभ्यास खेल खेल्दैछ । नेपालले क्यानडाविरुद्ध भारतको चेन्नईस्थित एमए चिदम्बरम स्टेडियममा प्रतिस्पर्धा गर्न लागेको हो । खेल दिउँसो सवा ३ बजेदेखि सुरु हुनेछ ।
यसअघि दुई दिनअघि सम्पन्न पहिलो अभ्यास खेलमा नेपालले युएईलाई ७ विकेटले पराजित गरेको थियो । उक्त खेलमा दीपेन्द्र सिंह ऐरी र आसिफ शेखले अर्धशतक प्रहार गर्दै टोलीलाई सहज जित दिलाएका थिए । दुवै खेलाडी हाल राम्रो लयमा देखिएका छन् ।
रोहित पौडेलको कप्तानीमा १५ सदस्यीय टोलीसहित नेपाल तेस्रो पटक टी–२० विश्वकपमा सहभागी हुन लागेको हो । विश्वकप आगामी फेब्रुअरी ७ देखि मार्च ८ सम्म भारत र श्रीलंकामा आयोजना हुनेछ ।
नेपाल रहेको समूहमा इङल्यान्ड, वेष्ट इण्डिज, स्कटल्याण्ड र इटाली छन् । नेपालले पहिलो खेल फेब्रुअरी ८ मा इङल्यान्डसँग खेल्नेछ । समूह चरणका सबै खेल नेपालले मुम्बईको वाङखडे स्टेडियममा खेल्ने तालिका छ ।
