दाङ (तुलसीपुर) – निरन्तरको निष्ठा र निस्वार्थ समर्पण कहिल्यै खेर जाँदैन भन्ने कुरालाई दाङका एक गौसेवकले प्रमाणित गरेका छन्। स्वदेशमा आफ्नो योगदानको उचित मूल्यांकन नभए तापनि आफ्नो कर्ममा अडिग दाङ, बेलझुण्डीका अनिल बिष्टलाई छिमेकी मित्र राष्ट्र भारतको प्रतिष्ठित सनातनी हिन्दू संगठनले उच्च मूल्यांकन गर्दै महत्त्वपूर्ण जिम्मेवारी सुम्पेको छ।
श्री योगी आदित्यनाथ फाउण्डेशन गाई संरक्षण केन्द्र, बेलझुण्डी (दाङ) का संस्थापक अध्यक्ष समेत रहेका बिष्टलाई भारतको ‘राष्ट्रिय गौरक्षा वाहिनी गौसेवा संघ’ ले नेपालका लागि कोअर्डिनेटर (प्रसार विभाग) को पदमा आधिकारिक रूपमा मनोनीत गरेको छ।
गत बुधबार संघका राष्ट्रिय अध्यक्ष श्री संजीव सिंह सेंगरद्वारा हस्ताक्षरित मनोनयन पत्रमार्फत उनलाई यो जिम्मेवारी प्रदान गरिएको हो। संगठनका राष्ट्रिय संरक्षक डा. इन्द्रेश कुमार, राष्ट्रिय उपाध्यक्ष प्रिन्स जैन लगायतका उच्च पदस्थ अधिकारीहरूको सहमतिमा समाज सेवा र गौसेवाका कार्यहरूलाई थप गति प्रदान गर्न उनलाई उक्त पदमा नियुक्त गरिएको हो।
नेपालमा रहेका स्थानीय (लोकल) गाईहरूको उचित व्यवस्थापन, संरक्षण र संवर्द्धन गर्ने प्रमुख जिम्मेवारी बिष्टलाई दिइएको हो। यस्तै समन्वय र विस्तारमा नेपालभित्र प्रदेश र जिल्ला स्तरमा संगठनका कार्यकर्ताहरूसँग समन्वय स्थापित गरी गौसेवाको उत्कृष्ट कार्यलाई गतिशील बनाउने जिम्मेवारी बिष्टलाइ दिइएको छ । अन्तर्राष्ट्रिय सेतुको कार्य गर्न नेपाल र भारतबीचको सनातन धर्म, संस्कृति र गौमाताप्रतिको आस्थालाई जोड्ने एक महत्त्वपूर्ण कडीको रूपमा यो नियुक्तिलाई हेरिएको छ।
“नेपालले चिन्न नसकेको तर निस्वार्थ रूपमा गाईको सेवामा समर्पित एक साधकलाई मित्र राष्ट्रले गरेको यो सम्मान सम्पूर्ण नेपाली गौभक्तहरूका लागि गर्वको विषय हो,” स्थानीय अगुवा भरतनाथ योगी बताउँछन । आफ्नो जीवन नै गौमाताको संरक्षणमा समर्पण गरेका अनिल बिष्टको यो अन्तर्राष्ट्रिय नियुक्तिले नेपालमा सडकमा बेवारिसे छोडिएका र संरक्षणको पर्खाइमा रहेका गाईहरूको उचित व्यवस्थापन हुनेमा आशा जगाएको छ।
यस मनोनयनले संगठन र समाजको हितमा काम गर्न उनलाई थप ऊर्जा र प्रेरणा मिल्ने विश्वास लिइएको छ। सन्तोषजनक कार्यसम्पादनको आधारमा यो जिम्मेवारीको समयावधि भविष्यमा थप विस्तार गरिने कुरा पनि मनोनयन पत्रमा उल्लेख छ। प्रमाणपत्र ग्रहण गरेपश्चात बोल्दै गौसेवक विष्टले अब जिम्मेवारी बढेको भन्दै अब दायरा बढाएर मेची महाकाली अभियानमा लाग्ने प्रतिवद्धता व्यक्त गर्नुभयो । उहाँले अब गौतस्करी रोक्न देशैभरका अभियन्ताहरु एकजुट भएर लाग्न आह्वान समेत गर्नुभयो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |