काभ्रे : डाँडापारी क्षेत्रका कृषि, सडक र शिक्षा जस्ता जनजीविकासँग जोडिएका विषयमा निरन्तर कलम चलाउँदै आएका कान्तिपुरकर्मी पुजन धिताल ‘उर्मिला सापकोटा स्मृति डाँडापारी पत्रकारिता पुरस्कार’बाट सम्मानित भएका छन्।
नेपाल प्रेस युनियन काभ्रेले बनेपामा आयोजना गरेको कार्यक्रममा धिताललाई नगद ५ हजार ५ सय ५५ रुपैयाँसहित सम्मानपत्र र दोसल्ला प्रदान गरिएको हो। पुरस्कार २०६६ सालमा डाँडापारीबाट ललितपुरको गोतीखेल जाने क्रममा सवारी दुर्घटनामा ज्यान गुमाएकी उर्मिला सापकोटाको स्मृतिमा परिवारले स्थापना गरेको हो।
एक दशकदेखि काभ्रेली पत्रकारितामा सक्रिय धिताल नमोबुद्ध मिडिया प्रालिका प्रबन्ध निर्देशक तथा ‘सबैको समाचार’का कार्यकारी सम्पादक हुन्। यसअघि उनले इमेज टेलिभिजन, ग्यालेक्सी टेलिभिजन तथा विभिन्न पत्रपत्रिका र एफएम रेडियोमा काम गरेका छन्। यस वर्ष डाँडापारी क्षेत्र केन्द्रित उनका समाचारलाई मूल्याङ्कन समितिले उत्कृष्ट ठहर गर्दै पुरस्कृत गरेको जनाएको छ।
कार्यक्रममा संरक्षक गोपालकृष्ण सापकोटाले डाँडापारीका समस्या उजागर गरी समृद्ध क्षेत्र निर्माणमा योगदान पुर्याउने पत्रकारलाई सम्मान गर्न पाउँदा छोरीको सम्झना ताजा हुने बताए। कार्यक्रममा प्रेस युनियन काभ्रेका प्रदेश पार्षद स्वर्गीय हिराकाजी लामा र उर्मिला सापकोटाको सम्झनामा मौनधारण तथा दीप प्रज्वलन गरिएको थियो।
सो अवसरमा नेपाल पत्रकार महासंघ काभ्रेका अध्यक्ष विनोदकुमार न्यौपानेले पुरस्कारले स्थानीय पत्रकारलाई थप जिम्मेवार र उत्साहित बनाएको उल्लेख गर्दै यसको निरन्तरताका लागि संरक्षक परिवारलाई धन्यवाद दिए। कार्यक्रममा महासंघका पूर्वअध्यक्ष, विभिन्न पेशागत संगठनका प्रमुख तथा सञ्चारकर्मीहरूको उपस्थिति रहेको थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |