काठमाडौँ: नेपाली कांग्रेसका उपसभापति विश्वप्रकाश शर्माले अबको पार्टीको मुख्य नीति आन्तरिक गुटबन्दी अन्त्य गरी सङ्गठन निर्माणमा केन्द्रित हुनुपर्ने बताएका छन्।
काभ्रेको धुलिखेलमा आयोजित बागमती प्रदेशस्तरीय भेलालाई सम्बोधन गर्दै उपसभापति शर्माले पार्टीभित्र व्याप्त अविश्वास र शङ्कालाई चिर्दै एकजुट भएर अगाडि बढ्न सम्बद्ध सबैलाई आग्रह गरे।क्रियाशील सदस्यता अद्यावधिक गर्ने विषयमा देखिएको विवादलाई प्रष्ट पार्दै शर्माले कुनै व्यक्ति विशेषमाथि मात्रै अविश्वास नगर्न अनुरोध गरे। उनले भने, “तपाईँहरू महामन्त्री गगन थापालाई विश्वास नगर्नुस्, ठिकै छ। तर, आफ्नै वडाको पार्टी सभापतिलाई त विश्वास गर्नुस्! सदस्यता अद्यावधिक गर्ने काम गगन थापाले एक्लै गर्ने होइन, वडा वडामा पुगेर त्यहीँका वडा सभापतिले गर्ने हो।”हालका वडा, पालिका र जिल्ला सभापतिहरू पार्टीको १४ औँ महाधिवेशनबाट लोकतान्त्रिक प्रक्रियामार्फत निर्वाचित भएको स्मरण गराउँदै शर्माले आफ्नै नेतृत्वमाथि शङ्का गरेर पार्टी अगाडि बढ्न नसक्ने जिकिर गरे।
पार्टीमा आउन सक्ने सम्भावित विभाजनलाई रोक्न उनले विशेष महाधिवेशनमा सहभागी नभएका नेता तथा कार्यकर्ताहरूलाई पनि उचित जिम्मेवारी दिएर समेट्नुपर्ने धारणा राखे। “यदि हामीले विशेष महाधिवेशनमा सहभागी भएकालाई मात्रै जिम्मेवारी दियौँ भने त्यसले पार्टी विभाजनलाई बल पुर्याउँछ। त्यसैले हामीले सहभागी नभएका साथीहरूलाई पनि क्रमशः जिम्मेवारी दिइरहेका छौँ र आगामी दिनमा थप समेट्दै लैजानेछौँ,” शर्माले स्पष्ट पारे।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |