काठमाडौँ : नेपालमा भिसा अवधि सकिएपछि पनि बस्ने विदेशी नागरिकको संख्या बढ्दो देखिएको छ। अध्यागमन विभागले पछिल्ला पाँच महिनामा देश निकाला गरेका विदेशीमध्ये झन्डै सातमध्ये पाँच जना ‘ओभरस्टे’मा परेका हुन्।
विभागले सार्वजनिक गरेको तथ्यांकअनुसार सन् २०२६ जनवरी १ देखि मे ११ सम्म १ सय ५२ विदेशी नागरिकलाई निष्काशन गरिएको छ। तीमध्ये १ सय ५ जनाले भिसा अवधि समाप्त भएपछि पनि नेपालमा बसोबास गरिरहेका थिए।
बाँकी ४७ जनालाई भने लागुऔषध कारोबार, भिसाको उद्देश्यविपरीत गतिविधि, नक्कली राहदानी तथा भिसासम्बन्धी अनियमितताका कारण देश निकाला गरिएको विभागले जनाएको छ।
विभागका अनुसार विदेशी नागरिकसम्बन्धी विवरण ‘विदेशी नागरिक व्यवस्थापन सूचना प्रणाली’मार्फत संकलन गरिएको हो।
यसअघि सन् २०२५ मा कुल ५ सय २६ विदेशी नागरिकलाई निष्काशन गरिएको थियो। तीमध्ये ४ सय ५९ जना ओभरस्टेमा परेका थिए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |