भदौ २४ को घटना पूर्वतयारीसहित गरिएको आयोगको निश्कर्ष

काठमााडौँ : गत वर्ष भदौ २४ गते देशका विभिन्न स्थानमा भएको हत्या, आगजनी र तोडफोडका घटना पूर्वयोजनाअनुसार संगठित रूपमा गराइएको राष्ट्रिय मानव अधिकार आयोगले निष्कर्ष निकालेको छ । आयोगले उक्त घटनालाई केवल प्रदर्शन वा स्वतःस्फूर्त आक्रोशका रूपमा नभई ‘आपराधिक गतिविधि’ का रूपमा अनुसन्धान गर्न सरकारलाई सिफारिस गरेको हो ।

आयोगले सार्वजनिक गरेको प्रतिवेदनमा भदौ २३ गतेको घटनापछि उत्पन्न आक्रोशले २४ गतेका गतिविधि सुरु भए पनि देशभर एकै समयमा समान प्रकृतिका हिंसात्मक घटना हुनु योजनाबद्ध गतिविधिको संकेत भएको उल्लेख छ । ‘यी घटनाहरू अगाडिदेखि नै गरिएको पूर्वयोजनाअनुसार संगठित रूपमा गरिएको आपराधिक कार्य हुन्,’ प्रतिवेदनमा भनिएको छ ।

आयोगका अनुसार उक्त दिन प्रदर्शनकारीको कुटपिटबाट तीन जना नेपाल प्रहरीको मृत्यु भएको थियो भने नेता, कार्यकर्ता तथा सुरक्षाकर्मीमाथि भएका आक्रमणमा धेरै घाइते भएका थिए । त्यस्तै आन्दोलनकारीले गरेको आगजनीमा २१ जनाको मृत्यु भएको आयोगले जनाएको छ । तीमध्ये ९ जनाको मात्र पहिचान खुलेको र १२ जनाको अझै पहिचान हुन नसकेको प्रतिवेदनमा उल्लेख छ ।

आगजनीमा परी प्राध्यापक रविलक्ष्मी चित्रकारसहित धेरै व्यक्ति गम्भीर घाइते भएको तथा देशभर अर्बौँ रुपैयाँ बराबरको निजी तथा सार्वजनिक सम्पत्तिमा क्षति पुगेको आयोगको भनाइ छ । घटनाको प्रकृति र क्षतिको स्वरूपलाई आधार मान्दै आयोगले यसलाई संगठित अपराधका रूपमा अनुसन्धान र कानुनी कारबाही अघि बढाउन सरकारलाई सुझाव दिएको छ ।