लगातार दोस्रो जितसँगै अमेरिका अन्तिम १६ मा प्रवेश

काठमाडौँ :  अमेरिकाले लगातार दोस्रो जित निकाल्दै फिफा विश्वकप २०२६ को नकआउट चरणमा स्थान सुरक्षित गरेको छ। सिएटल स्टेडियममा शुक्रबार भएको समूह ‘डी’ को खेलमा अष्ट्रेलियालाई २-० ले हराउँदै अमेरिका अन्तिम १६ मा पुग्न सफल भएको हो ।

दुई खेलबाट शतप्रतिशत ६ अंक जोडेको अमेरिका कम्तीमा उत्कृष्ट तेस्रो स्थानको टोलीका रूपमा पनि अगाडि बढ्ने अवस्थामा पुगेको छ। अब पाराग्वे र टर्कीबीचको खेलको नतिजाले अमेरिकाको समूहस्थितिलाई थप स्पष्ट पार्नेछ।

अमेरिकाले खेलको ११औँ मिनेटमै अग्रता लिएको थियो। फोलारिन बालोगुनको क्रस क्लियर गर्ने क्रममा अष्ट्रेलियाका डिफेन्डर क्यामरुन बर्गेसबाट आत्मघाती गोल भएपछि अमेरिका अघि बढेको हो। पहिलो हाफको अन्त्यतिर एलेक्स फ्रीम्यानले गोल थप्दै घरेलु टोलीको अग्रता दोब्बर बनाए।

दोस्रो हाफमा अष्ट्रेलियाले केही आक्रामक खेल प्रदर्शन गरे पनि गोल फर्काउन सकेन। पराजित अष्ट्रेलियाको दुई खेलबाट ३ अंक छ भने पाराग्वे र टर्की अझै अंकविहीन छन्। अमेरिकाले यसअघि उद्घाटन खेलमा पाराग्वेलाई हराएको थियो।