वैदेशिक रोजगार व्यवसायीहरूले साउदी अरब जाने नेपाली श्रमिकका लागि लागू गर्न लागिएको अनिवार्य स्किल भेरिफिकेसन प्रोग्राम (एसभीपी) तत्काल स्थगित गर्न सरकारसँग माग गरेका छन्।
नेपाल सरकार र सम्बन्धित सरोकारवालासँग पर्याप्त समन्वय तथा द्विपक्षीय सहमति नगरी साउदी पक्षले एकतर्फी रूपमा यस्तो व्यवस्था लागू गर्न खोजेको भन्दै व्यवसायीहरूले त्यसप्रति आपत्ति जनाएका हुन्।
वैदेशिक रोजगार व्यवसायी संघका अध्यक्ष डिकबहादुर खत्री र महासचिव हिरा बहादुर डाँगीले संयुक्त रूपमा जारी गरेको विज्ञप्तिमा नेपाल र साउदी अरबबीच श्रमिक आपूर्ति बिजनेस–टु–बिजनेस (बी–टु–बी) प्रणालीमार्फत भइरहेको उल्लेख गरिएको छ। विज्ञप्तिअनुसार रोजगारदाता कम्पनीले आवश्यक योग्यता, अनुभव र सीपका आधारमै श्रमिक छनोट गरिरहेको अवस्थामा थप अनिवार्य सीप प्रमाणीकरणको व्यवस्था आवश्यक नरहेको संघको भनाइ छ।
संघले नयाँ व्यवस्था लागू गर्नुअघि नेपाल सरकार, वैदेशिक रोजगार क्षेत्रका सरोकारवाला र निजी क्षेत्रसँग पर्याप्त छलफल तथा सहमति हुनुपर्नेमा जोड दिएको छ। पर्याप्त तयारी र परामर्शबिनै नयाँ प्रावधान लागू गरिए त्यसले श्रमिकको वैदेशिक रोजगारी प्रक्रियामा थप जटिलता सिर्जना गर्ने तथा अनावश्यक आर्थिक र प्रशासनिक भार थप्ने संघको दाबी छ।
सरोकारवालाको सहमति र आवश्यक तयारीपछि मात्र यस्ता व्यवस्था कार्यान्वयनमा ल्याउनुपर्ने माग गर्दै संघले हालका लागि एसभीपी कार्यक्रम तत्काल रोक्न सम्बन्धित निकायसँग आग्रह गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |