अविरल वर्षापछि काभ्रेपलाञ्चोकको रोशी गाउँपालिका-९ पिन्थलीवेशी क्षेत्रमा लेदोसहितको बाढी र पहिरो खस्दा वि.पी. राजमार्ग अवरुद्ध भएको छ। राजमार्ग बन्द हुँदा अलपत्र परेका पाँच सयभन्दा बढी यात्रु र एक सयभन्दा बढी सवारी साधनलाई उद्धार गरी सुरक्षित गन्तव्यतर्फ पठाइएको छ।
सशस्त्र प्रहरी बलको मंगलटारस्थित टोलीका अनुसार पहिरोका कारण सडक पूर्ण रूपमा अवरुद्ध भएपछि यात्रु र सवारी साधन जोखिममा परेका थिए। त्यसपछि निर्माणाधीन राजमार्गमा सञ्चालनमा रहेका स्काभेटर र जेसीबीको प्रयोग गरी सडक खुलाउने तथा उद्धार गर्ने काम गरिएको हो।
नेपाल प्रहरी, सशस्त्र प्रहरी र सम्बन्धित निकायको समन्वयमा उद्धार कार्य सम्पन्न भएको जनाइएको छ। उद्धारपछि अलपत्र परेका यात्रु र सवारी साधनलाई सुरक्षित रूपमा गन्तव्यतर्फ पठाइएको प्रहरीले जनाएको छ।
प्रहरीले वर्षायाममा यात्रा गर्दा मौसम र सडकको अवस्थाबारे जानकारी लिएर मात्रै यात्रा गर्न सर्वसाधारणलाई आग्रह गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |