काठमाडौँ : बेल्जियमले संयुक्त राज्य अमेरिकामाथि ४-१ को प्रभावशाली जित निकाल्दै फिफा विश्वकप २०२६ को क्वार्टरफाइनलमा स्थान बनाएको छ। यससँगै आयोजक तीनै देशको विश्वकप यात्रा पनि समाप्त भएको छ। यसअघि क्यानडा र मेक्सिको बाहिरिइसकेका थिए भने अन्तिम १६ मा अमेरिकाको यात्रा पनि टुंगिएको हो।
आज बिहान भएको प्रतिस्पर्धामा बेल्जियमका युवा खेलाडी चार्ल्स डे केटेलारेले दुई गोल गर्दै टोलीको जितमा निर्णायक भूमिका निर्वाह गरे। उनले नवौं मिनेटमा गोल गर्दै टोलीलाई अग्रता दिलाएका थिए। अमेरिकाका म्यालिक टिलम्यानले ३१औँ मिनेटमा बराबरी गोल फर्काए पनि त्यसको दुई मिनेटपछि डे केटेलारेले व्यक्तिगत दोस्रो गोल गर्दै बेल्जियमलाई पुनः अग्रता दिलाए।
दोस्रो हाफमा हान्स भानाकेनले ५७औँ मिनेटमा गोल गरेपछि बेल्जियमले खेलमाथि पूर्ण नियन्त्रण जमायो। इन्जुरी टाइमको तेस्रो मिनेटमा अनुभवी स्ट्राइकर रोमेलु लुकाकुले अर्को गोल थप्दै ४-१ को सहज जित सुनिश्चित गरे।
अब बेल्जियमले सेमिफाइनल प्रवेशका लागि स्पेनसँग प्रतिस्पर्धा गर्नेछ। प्रतियोगिताअन्तर्गत आज राति अर्जेन्टिना-इजिप्ट तथा कोलम्बिया–स्विट्जरल्यान्डबीच खेल हुनेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |