काठमाडौँ : राहदानी विभागअघि आत्मदाह प्रयासपछि गम्भीर घाइते भएका मुगुका गणेश नेपालीलाई उपचारका लागि भारत लैजाने सरकारी तयारी अन्तिम समयमा स्थगित गरिएको छ। भेन्टिलेटरमा रहेका उनलाई अहिले स्थानान्तरण गर्दा ज्यानको जोखिम बढ्ने चिकित्सकहरूको सुझावपछि सरकारले तत्काल वीर अस्पतालमै उपचार जारी राख्ने निर्णय गरेको हो।
प्रधानमन्त्रीको सचिवालयका अनुसार दिल्लीस्थित एम्स अस्पताल लैजान एयर एम्बुलेन्ससहित सबै तयारी पूरा भइसकेको थियो। गृहमन्त्री सुधन गुरुङ पनि व्यवस्थापनमा खटिएका थिए। तर स्वास्थ्य अवस्था थप अस्थिर बनेपछि चिकित्सकहरूले तत्काल अन्यत्र लैजान नहुने सिफारिस गरेका हुन्।
बिहीबारदेखि वीर अस्पतालको बर्न आईसीयूमा उपचाररत नेपालीको शरीरको माथिल्लो अधिकांश भाग जलेको छ। प्लास्टिक सर्जरी विभागका संयोजक डा. पियुष दाहालको नेतृत्वमा २१ सदस्यीय चिकित्सक टोलीले रक्तचाप नियन्त्रणमा राख्दै सघन उपचार गरिरहेको अस्पतालले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |