बागमतीमा बाढी, सुन्दरीघाटको होल्डिङ सेन्टर डुबानमा

काठमाडौँ : अविरल वर्षापछि बागमती नदीमा आएको बाढीले कीर्तिपुरको सुन्दरीघाटस्थित राधास्वामी सुकुम्बासी होल्डिङ सेन्टर डुबानमा परेपछि त्यहाँ आश्रय लिइरहेका दर्जनौं परिवार पुनः विस्थापित भएका छन्।

डुबानका कारण सेन्टरभित्र रहेका अधिकांश घरायसी सामग्री, लत्ताकपडा र दैनिक उपभोगका सामान नष्ट भएका छन्।

गृह मन्त्रालयका अनुसार शनिबार बिहान डुबानको सूचना प्राप्त भएपछि दंगा नियन्त्रण रेजिमेन्टबाट प्रहरी नायब उपरीक्षक ९डीएसपी० को नेतृत्वमा डिजास्टर म्यानेजमेन्टसहित ३० जना र नेपाल प्रहरीका थप ३० जनाको टोली परिचालन गरिएको थियो।

होल्डिङ सेन्टरमा रहेका १५४ जनामध्ये ५४ जनाको उद्धार गरी त्रिभुवन विश्वविद्यालयस्थित स्मृति भवनमा सुरक्षित रूपमा स्थानान्तरण गरिएको मन्त्रालयले जनाएको छ। ६ जना आफन्त वा नजिकैको होस्टलमा गएका छन् भने ९४ जना सेन्टरभित्रै पानी नपसेको सुरक्षित स्थानमा बसेका छन्।

पीडितहरूले राति एक्कासि बाढी पस्दा सामान जोगाउने समयसमेत नपाएको र सुरक्षाकर्मी राति करिब २ बजेपछि मात्र पुगेको गुनासो गरेका छन्। प्रभावितहरूका लागि हाल खाना, खानेपानी तथा अन्य राहत सामग्रीको व्यवस्थापन भइरहेको गृह मन्त्रालयले जनाएको छ।