काठमाडौँ : विश्वकप इतिहासमै पहिलो पटक क्वाटरफाइनल पुगेको नर्वेको ऐतिहासिक यात्रा इङ्ल्यान्डसँग अतिरिक्त समयमा रोकिएको छ। सुरुआती अग्रता जोगाउन नसक्दा नर्वे २–१ ले पराजित भयो भने जुड बेलिङहम अतिरिक्त समयका निर्णायक नायक बने।
मियामीमा आइतबार बिहान भएको क्वाटरफाइनलमा आन्द्रियास शेल्देरुपको गोलबाट नर्वेले सुरुआती अग्रता बनाएको थियो। उच्च तापक्रम र आर्द्रताबीच खेलिएको प्रतिस्पर्धामा इङ्ल्यान्डले पहिलो हाफमै बेलिङहमको उत्कृष्ट गोलमार्फत बराबरी फर्कायो। त्यसपछि दुवै टोलीले अवसर सिर्जना गरे पनि निर्धारित ९० मिनेटमा नतिजा ननिस्किएपछि खेल अतिरिक्त समयमा पुगेको थियो।
अतिरिक्त समयमा नर्वेका गोलकिपर ओर्यान न्युलान्डले मोर्गन रोजर्सको प्रहार नियन्त्रण गर्न नसक्दा आएको रिबाउन्डमा बेलिङहमले निर्णायक गोल गर्दै इङ्ल्यान्डलाई अन्तिम चारमा पुर्याए। नर्वेको एक गोल भीएआरमार्फत रद्द हुँदा र क्रिस्टोफर आजेरको प्रहार क्रसबारमा लागेर फर्किँदा उसले पुनः अग्रता लिने अवसर गुमाएको थियो। इङ्ल्यान्डले अब सेमिफाइनलमा अर्जेन्टिना र स्विट्जरल्यान्डबीचको विजेतासँग प्रतिस्पर्धा गर्नेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |