फ्रान्सलाई हराउँदै स्पेन विश्वकपको फाइनलमा

काठमाडौँ : युरोपेली च्याम्पियन स्पेनले फिफा विश्वकप २०२६ को उपाधिनजिक आफूलाई पुर्‍याएको छ। सेमिफाइनलमा बलियो दाबेदार फ्रान्सलाई २-० ले पराजित गर्दै स्पेनले फाइनलमा स्थान सुरक्षित गरेको हो।

अमेरिकाको टेक्सासस्थित आर्लिङ्टनमा बुधबार बिहान सम्पन्न खेलमा स्पेनले सुरुदेखि नै खेलमा नियन्त्रण कायम राख्दै फ्रान्सलाई अवसर सिर्जना गर्नै दिएन। पहिलो हाफमा मिकेल ओयार्जाबलले पेनाल्टीमार्फत स्पेनलाई अग्रता दिलाएका थिए। लामिन यामलमाथि लुकास डिन्येले गरेको फाउलपछि प्राप्त पेनाल्टीलाई उनले सहजै गोलमा परिणत गरे।

दोस्रो हाफ सुरु भएको केही क्षणमै डानी ओल्मोसँगको उत्कृष्ट संयोजनमा पेड्रो पोरोले दोस्रो गोल गर्दै स्पेनको जित लगभग निश्चित बनाए। चोटका कारण विलियम सलिबा मैदानबाट बाहिरिनु फ्रान्सका लागि अर्को झट्का बन्यो।

स्टार खेलाडीहरूले भरिएको फ्रान्सले पूरा खेलभर स्पेनको संगठित रक्षापंक्ति भेद्न सकेन। पहिलो हाफमा लक्ष्यतर्फ एउटा पनि प्रहार गर्न नसकेको फ्रान्स दोस्रो हाफमा पनि प्रभावशाली पुनरागमन गर्न असफल रह्यो।

यससँगै स्पेनले अब उपाधिका लागि इङ्ल्यान्ड र अर्जेन्टिनाबीचको दोस्रो सेमिफाइनलको विजेतासँग प्रतिस्पर्धा गर्नेछ।