काठमाडौँ : अन्तिम सात मिनेटमा खेलको दिशा उल्टाउँदै साविक विजेता अर्जेन्टिनाले इङ्ल्यान्डलाई २-१ ले पराजित गरेको छ।
अमेरिकाको एटलान्टास्थित मर्सिडिज–बेन्ज स्टेडियममा बुधबार राति भएको विश्वकप २०२६ को सेमिफाइनलमा कप्तान लियोनल मेसीको सिर्जनशील खेल र इन्जुरी समयमा लाउटारो मार्टिनेजको निर्णायक हेडरले अर्जेन्टिनालाई लगातार दोस्रोपटक विश्वकप फाइनलमा पुर्याएको हो।
पहिलो हाफ गोलरहित बराबरीमा सकिएको खेलमा इङ्ल्यान्डले ५५औँ मिनेटमा एन्थोनी गोर्डनको गोलबाट अग्रता लिएको थियो। त्यसपछि लगातार दबाब बनाएको अर्जेन्टिनाले ८५औँ मिनेटमा मेसीको पासमा एन्जो फर्नान्डेजमार्फत बराबरी गोल फर्कायो।
अतिरिक्त समयतर्फ खेल लम्बिने संकेत देखिइरहेका बेला इन्जुरी समयको दोस्रो मिनेटमा मेसीकै क्रसलाई वैकल्पिक खेलाडी लाउटारो मार्टिनेजले हेडमार्फत गोलमा परिणत गर्दै अर्जेन्टिनाको जित सुनिश्चित गरे।
अब अर्जेन्टिनाले उपाधिका लागि आइतबार न्यु जर्सीको मेटलाइफ स्टेडियममा युरोपेली च्याम्पियन स्पेनसँग प्रतिस्पर्धा गर्नेछ। इङ्ल्यान्डले भने तेस्रो स्थानका लागि फ्रान्सको सामना गर्नेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |