काठमाडौं : चालु आर्थिक वर्ष २०८३/८४ सुरु भएको तीन साताभन्दा बढी बितिसक्दा पनि देशभरका १३ स्थानीय तहले अझै वार्षिक बजेट सार्वजनिक गरेका छैनन्। भूमि व्यवस्था, सहकारी तथा गरिबी निवारण मन्त्रालयअन्तर्गतको स्थानीय तह पोर्टलमा प्रविष्ट विवरणअनुसार ७५३ मध्ये ७४० स्थानीय तहले बजेट सार्वजनिक गरेर कार्यान्वयन सुरु गरिसकेका छन्।
बजेट ल्याउन नसक्नेमा सबैभन्दा धेरै मधेश प्रदेशका १० स्थानीय तह छन्। कोशी प्रदेशको धरान उपमहानगरपालिका, लुम्बिनी प्रदेशको रुपन्देहीस्थित कोटहीमाई गाउँपालिका र कपिलवस्तुको शुद्धोधन गाउँपालिका पनि बजेटविहीन छन्। वाग्मती, गण्डकी, कर्णाली र सुदूरपश्चिम प्रदेशका सबै स्थानीय तहले भने असारभित्रै बजेट सार्वजनिक गरी कार्यान्वयन प्रक्रिया अघि बढाइसकेका छन्।
संविधानअनुसार स्थानीय तहले असार महिनाभित्र वार्षिक बजेट सार्वजनिक गर्नुपर्ने व्यवस्था छ। त्यसअनुसार अधिकांश स्थानीय तहले बजेट कार्यान्वयन सुरु गरिसके पनि १३ स्थानीय तहमा बजेट नआउँदा विकास योजना र नियमित प्रशासनिक खर्च प्रभावित हुने देखिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |