आर्थिक अभाव भएका अशक्त वृद्धवृद्धाको निःशुल्क उपचार:आर. एस. क्षेत्रीको मानवीय अभियान

काठमाडौँ : नेपालका कतिपय गाउँ-बस्ती र सहरका कुनाहरूमा अझै पनि त्यस्ता ज्येष्ठ नागरिकहरू भेटिन्छन्, जसका आँखामा जीवनको उत्तरार्धमा औषधि र अस्पताल पुग्ने आस त छ, तर रित्तो गोजीले हरेक पटक निराशा मात्र थपिदिन्छ। कुनै समय परिवार, समाज र राष्ट्रको जग बसाल्न आफ्नो ऊर्जा खर्चिएका तिनै पाका अभिभावकहरू आज आर्थिक अभाव, अशक्तता र एक्लोपनको भूमरीमा पिल्सिएका छन्।

यस्तै अभाव र उपेक्षाको अँध्यारोमा एउटा आशाको किरण बनेर आएको छ- Aging Life Care र यसका संस्थापक आर. एस. क्षेत्री को मानवीय अभियान।

“ज्येष्ठ नागरिक करुणाका मात्र होइन, सम्मान र अधिकारका हकदार हुन्” भन्ने मूल मन्त्रलाई आत्मसात् गर्दै यो संस्थाले विपन्न, अशक्त र असहाय वृद्धवृद्धाहरूका लागि निःशुल्क स्वास्थ्य तथा पुनःस्थापना सेवा अघि बढाएको छ। बढ्दो सहरीकरण, वैदेशिक रोजगारी र संयुक्त परिवारको विघटनले धेरै पाका उमेरका मानिसहरूलाई आफ्नै घरमा उपेक्षित वा बेसहारा बनाएको छ। रोग लुकाएर बस्नु वा आर्थिक अभावकै कारण उपचार बीचमै छाड्नु उनीहरूको बाध्यता बनेको छ।

आजभोलि साना-तिना स्वास्थ्य समस्याका लागिसमेत निजी अस्पताल तथा क्लिनिकहरूमा पुग्दा लाखौँ रुपैयाँ खर्च गर्नुपर्ने बाध्यता सामान्यझैँ बनेको छ, जसले विपन्न नागरिकको पहुँचबाट उपचार सेवा निकै टाढा पुर्‍याएको छ। यस्तो अवस्थामा, Aging Life Care एक निजी संस्था भएर पनि आर्थिक अभाव भएका, अशक्त र असहाय वृद्धवृद्धाहरूको निःशुल्क उपचार गर्ने पवित्र उद्देश्यका साथ अगाडि बढेको छ।

यही बाध्यता र सामाजिक खाडललाई पुर्ने प्रयासमा संस्थापक क्षेत्रीले यस अभियानलाई अगाडि बढाएका हुन्। संस्थाले लक्षित ज्येष्ठ नागरिकहरूलाई निःशुल्क उपचार, फिजियोथेरापी, घरमै नर्सिङ सेवा, केयरगिभर सहयोग र मानसिक परामर्शजस्ता सेवाहरू उपलब्ध गराउँदै आएको छ।

यस संस्थालाई केवल एउटा सेवा प्रदायकका रूपमा मात्र होइन, सामाजिक उत्तरदायित्व र आत्मीयताको सञ्जालका रूपमा विस्तार गरिएको छ। संस्थाको दीर्घकालीन सपना नेपालभर आधुनिक जेरियाट्रिक (ज्येष्ठ नागरिक) स्वास्थ्य सेवा, पुनःस्थापना केन्द्र र दक्ष जनशक्ति तयार पारी वृद्ध हेरचाहको दिगो प्रणाली निर्माण गर्नु हो।

सभ्य समाजको परिचय सुविधासम्पन्न भवनहरूले मात्र दिँदैनन्, आफ्ना पाका पुस्तालाई कति सम्मान र सुरक्षा दिइन्छ भन्ने कुराले निर्धारण गर्छ। आर्थिक अभावकै कारण कुनै पनि ज्येष्ठ नागरिकले उपचारबाट वञ्चित हुनु नपरोस् भन्ने यो अभियानमा सरकार, निजी क्षेत्र र नागरिक समाजको हातेमालो हुन सके वृद्ध हेरचाहको क्षेत्रमा एउटा लोभलाग्दो अध्याय थपिनेछ।