आज विश्व आदिवासी दिवस

काठमाडौँ : विश्वभरका आदिवासी जनजातिको अधिकार, पहिचान र सांस्कृतिक विविधताको संरक्षणमा जोड दिँदै आज विश्व आदिवासी दिवस मनाइँदैछ। दिवसका अवसरमा आदिवासी समुदायको भाषा, परम्परागत ज्ञान, जीवनपद्धति र पुर्ख्यौली भूमि तथा प्राकृतिक स्रोतसाधनमाथिको अधिकार सुनिश्चित गर्नुपर्ने विषयमा विभिन्न कार्यक्रम हुँदैछन्।

संयुक्त राष्ट्रसङ्घको महासभाले सन् १९९४ डिसेम्बर २३ मा हरेक वर्ष अगस्ट ९ लाई विश्व आदिवासी दिवसका रूपमा मनाउने निर्णय गरेको थियो। सन् १९८२ मा जेनेभामा संयुक्त राष्ट्रसङ्घको आदिवासी जनसङ्ख्यासम्बन्धी कार्यसमूहको पहिलो बैठक यही दिन भएकाले अगस्ट ९ लाई दिवसका रूपमा छनोट गरिएको हो।

संयुक्त राष्ट्रसङ्घका अनुसार विश्वका ९० देशमा करिब ४७ करोड ६० लाख आदिवासी जनजाति छन्। उनीहरू विश्व जनसङ्ख्याको ६ प्रतिशतभन्दा कम भए पनि विश्वका गरिबमध्ये कम्तीमा १५ प्रतिशत आदिवासी समुदायका छन्।

दिवसले आदिवासी जनजातिको अधिकार संरक्षणसँगै उनीहरूको निर्णय प्रक्रियामा अर्थपूर्ण सहभागिताको आवश्यकता औंल्याउँदै आएको छ।