काठमाडौं : नेपाल प्रहरी अस्पतालमा कार्यरत चिकित्सक तथा नर्सिङ अधिकृतलाई प्राज्ञिक उपाधि प्रदान गरिएको छ। चिकित्सा विज्ञान राष्ट्रिय प्रतिष्ठान (न्याम्स) को प्राज्ञिक परिषद्ले मापदण्ड पूरा गरेका ३६ जनालाई विभिन्न प्राज्ञिक पदवी प्रदान गर्ने निर्णय गरेसँगै शुक्रबार आयोजित समारोहमा उनीहरूलाई प्रमाणपत्र वितरण गरिएको हो।
नेपाल प्रहरी अस्पताल महाराजगञ्जमा आयोजित कार्यक्रममा प्रहरी महानिरीक्षक डा. मनोजकुमार केसीले १७ चिकित्सकलाई सह–प्राध्यापक तथा १९ जनालाई सहायक प्राध्यापकको प्रमाणपत्र प्रदान गर्नुभयो। सहायक प्राध्यापकको उपाधि पाउनेमा १८ चिकित्सक र एक नर्सिङ अधिकृत छन्।
नेपाल प्रहरीभित्रै दक्ष स्वास्थ्य जनशक्ति उत्पादन गर्ने र भविष्यमा नेपाल प्रहरी मेडिकल कलेज स्थापना गर्ने दीर्घकालीन योजनाअन्तर्गत यो प्राज्ञिक पदवी प्रदान गरिएको अस्पतालले जनाएको छ। यसका लागि नेपाल प्रहरी अस्पताल र चिकित्सा विज्ञान राष्ट्रिय प्रतिष्ठानबीच सम्झौता भएको थियो।
कार्यक्रममा प्रहरी महानिरीक्षक केसीले प्राज्ञिक उपाधि चिकित्सकहरूको लामो अध्ययन, अनुसन्धान र व्यावसायिक समर्पणको सम्मान भएको बताउनुभयो। उहाँले प्राप्त ज्ञान र सीपलाई प्रहरी अस्पतालको सेवा विस्तार तथा मेडिकल कलेज स्थापनाको लक्ष्य हासिल गर्न उपयोग गर्नुपर्नेमा जोड दिनुभयो।
समारोहमा न्याम्सका उपकुलपति प्राध्यापक डा. विवेक आचार्यले पदवी प्राप्त गर्नेहरूलाई बधाई दिँदै शैक्षिक तथा व्यावसायिक जिम्मेवारी कुशलतापूर्वक निर्वाह गर्न आग्रह गर्नुभयो। कार्यक्रममा प्रहरीका उच्च अधिकारी तथा नेपाल मेडिकल काउन्सिलका पदाधिकारीहरूको उपस्थिति थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |