नेपालमा पहिलोपटक ‘राष्ट्र सेवा शक्तिसाधना नशामुक्ति शिविर’

काठमाडौं : नेपालमा पहिलोपटक राष्ट्र सेवा शक्तिसाधना नशामुक्ति शिविर आगामी जेठ २ र ३ गते काठमाडौंको पाशुपत क्षेत्रस्थित पार्किङ ग्राउन्डमा आयोजना हुने भएको छ। भगवती मानव कल्याण संगठनले सोमबार राजधानीमा पत्रकार सम्मेलन गर्दै शिविरको तयारीबारे जानकारी गराएको हो।

संगठनका केन्द्रीय प्रवक्ता रमेशचन्द्र मिश्रका अनुसार शिविरमा देश–विदेशबाट करिब ३० हजारभन्दा बढी सहभागी हुने अपेक्षा गरिएको छ। शिविर भगवती मानव कल्याण संगठन र पञ्चज्योति शक्तितीर्थ सिद्धाश्रम ट्रस्टका संस्थापक–सञ्चालक धर्मसम्राट युगचेतना पुरुष परमहंस योगिराज श्री शक्तिपुत्रजी महाराजको सान्निध्यमा सञ्चालन हुनेछ।

आध्यात्मिक शक्तिसाधना र नशामुक्तिको दुर्लभ अवसर
नेपाल शाखा प्रमुख डा.मिनु सिग्देलका अनुसार शिविरमा अष्टाङ्ग योग, नवदा भक्ति र कुण्डलिनी शक्ति साधनाको माध्यमबाट सहभागीहरूलाई साधना पथमा उन्नत गराइनेछ।
ूयो शिविरमा सामूहिक रूपमा हजारौँ मानिसहरू नशामुक्त हुने छन्,डा। सिग्देलले भनिन्, शक्तिसाधनाको गूढ रहस्य समेत योगिराज श्री शक्तिपुत्रजी महाराजद्वारा प्रत्यक्ष रूपमा अवगत गराइनेछ।

दुई दिवसीय शिविर, योग ध्यानदेखि गुरुदीक्षासम्म
संगठनका प्रचारमन्त्री नारायण सेंढाइका अनुसार कार्यक्रमको पहिलो दिन बिहान ७ देखि ९ बजेसम्म योग ध्यान साधना गरिने छ। दिउँसो २ देखि ५ बजेसम्म योगिराज शक्तिपुत्रजी महाराजको चेतनात्मक प्रवचन हुनेछ। साँझ ४ देखि ५ बजेसम्म माता दुर्गा भवानीको दिव्य आरती गरिनेछ। दोश्रो दिन बिहान ७ बजे गुरुदीक्षा कार्यक्रम आयोजना गरिनेछ।

शक्तिजल वितरण, नशामुक्ति सेवा निःशुल्क
शिविरमा नशाको लत र मानसिक तनावबाट मुक्ति दिलाउने, ठूलो बीमारीमा सहायक हुने शक्तिजल निःशुल्क वितरण गरिनेछ। नशामुक्ति सेवा समेत निःशुल्क रहने र इच्छुकहरूका लागि टोल फ्री नम्बर १८१०५०००१४५ मा सम्पर्क गर्न सकिने बताइएको छ।

संगठनको सामाजिक अभियान
भगवती मानव कल्याण संगठनले हालसम्म ५ हजारभन्दा बढी व्यक्तिहरूलाई नशामुक्त गराइसकेको छ। साथै, गत श्रावणदेखि सुरु गरिएको ‘एक वृक्ष–राष्ट्रको नाममा’ अभियान अन्तर्गत देशव्यापी रूपमा एक करोड वृक्षारोपण कार्यक्रम सञ्चालन भइरहेको छ।
संगठनले समाजबाट नशा, मांसाहार, जातीय विभेद, छुवाछुतजस्ता विकृति हटाउँदै चरित्रवान, चेतनशील, परोपकारी तथा पुरुषार्थी समाज निर्माणमा क्रियाशील रहेको जनाएको छ।