अहमदाबाद : भारतको अहमदाबादबाट लण्डन ग्याटविकका लागि उडेको एयर इन्डियाको यात्रुबाहक विमान बिहीबार बिहान दुर्घटना हुँदा २४२ जनाको ज्यान गएको छ ।
भारतीय प्रहरीका अनुसार विमान शहरको घना बस्तीमा खसेपछि कोही पनि जीवित नबचेको प्रारम्भिक अनुमान गरिएको छ । दुर्घटनामा दुई पाइलटसहित १० चालक दलका सदस्य र २३० यात्रु सवार थिए । भारतीय नागरिक उड्डयन प्राधिकरणका अनुसार विमानले उडानपछि आपतकालीन संकेत ९मे डे० पठाएको थियो । विमानस्थल नजिकै रहेको आवासीय क्षेत्र हर्स क्याम्प र सिभिल अस्पताल छेउ खसेको बताइएको छ । विमानको पछाडिको भाग भवनमा ठोक्किएको छ ।
विमानमा १६९ भारतीय, ५३ बेलायती, ७ पोर्चुगाली र १ क्यानाडेली नागरिक रहेको एयर इन्डियाले जनाएको छ । स्थानीय बासिन्दाहरूका अनुसार दुर्घटनास्थलमा शवहरू जलेको अवस्थामा भेटिएका छन् । प्रहरी आयुक्त जीएस मलिकका अनुसार विमान घना बस्तीमा खसेकाले बाहिरी मानवीय क्षति पनि हुन सक्ने अनुमान छ । दुर्घटनास्थलमा उद्धार र आगो नियन्त्रणको काम जारी छ ।
बेलायती प्रधानमन्त्री केइर स्टार्मरले दुर्घटनामा मृत्यु भएकाप्रति गहिरो समवेदना प्रकट गर्दै सामाजिक सञ्जालमार्फत उक्त घटनालाई “विनाशकारी” भनेका छन् ।
