काठमाडौं : स्कटल्यान्डमा जारी त्रिकोणात्मक टी–२० सिरिज अन्तर्गत नेदरल्यान्ड्सविरुद्धको रोमाञ्चक खेलमा नेपाल तेस्रो सुपर ओभरमा २ विकेटले पराजित भएको छ।
लगातार तीन सुपर ओभरसम्म तानिएको खेलमा नेपालले जितको सम्भावना नजिक पुगेर पनि खेल गुमाएको हो। नेदरल्यान्ड्सले दिएको १५३ रनको लक्ष्य पछ्याउँदै नेपालले निर्धारित २० ओभरमा ८ विकेटको क्षतिमा १५२ रन बनायो। खेल बराबरी भएपछि सुपर ओभरमा प्रवेश गर्यो।
पहिलो सुपर ओभरमा नेपालका कुशल भुर्तेलले २ छक्का र १ चौका सहित १८ रन जोडे। कप्तान रोहितकुमार पौडेलले १ रन थप्दा नेपालले १९ रन बनायो। जवाफी ब्याटिङमा करण केसीको ओभरमा नेदरल्यान्ड्सले पनि १९ रन जोडेर खेल दोस्रो सुपर ओभरमा पुर्यायो।
दोस्रो सुपर ओभरमा नेदरल्यान्ड्सले १८ रन बनायो। जवाफमा दीपेन्द्रसिंह ऐरी र रोहितकुमार पौडेलको आक्रमणले नेपालले बराबरी स्कोर गर्दै खेल तेस्रो सुपर ओभरमा पुर्यायो।
तर निर्णायक तेस्रो सुपर ओभरमा नेपालका लागि खेलले अनपेक्षित मोड लियो। रोहित पहिलो बलमै क्याच भए भने अर्का ब्याटर रुपेश सिंह दुई बल डट खेल्दै चौथो बलमा आउट भए। नेपालले रन नै बनाउन नसकेपछि नेदरल्यान्ड्सलाई मात्र १ रनको लक्ष्य मिल्यो।
नेपालका लागि बलिङमा सन्दीप लामिछानेले जिम्मेवारी लिएका थिए। तर, माइकल लेभिटले पहिलो बलमै छक्का प्रहार गर्दै नेदरल्यान्ड्सलाई नाटकीय जित दिलाए।
सिरिजमा यो नेदरल्यान्ड्सको पहिलो जित हो। जितसँगै उसले २ अंक जोडेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |