रसुवा : अविरल वर्षापछि आएको बाढीले नेपाल–चीन जोड्ने मितेरी पुल बगाएपछि दुई देशबीचको भौतिक सम्पर्क पूर्णरूपमा टुटेको छ।
चीनसँगको सीमाना जोड्ने मितेरी पुल पूर्ण रूपमा बगाएको प्रमुख जिल्ला अधिकारी अर्जुन पौडेलले जानकारी दिए । मानवीय क्षतिको यकिन विवरण आउन बाँकी रहे पनि जलविद्युत् आयोजनाका सामग्री र भन्सार परिसरका पार्किङमा रहेका गाडीहरू समेत बगाएको जानकारी प्राप्त भएको छ। त्यही गाडीमा सुतेका कामदार बगेको हुनसक्ने पौडेलले आशंका गरे ।
प्रहरीको १२ जनाको टोली घटनास्थलतर्फ गएको भए पनि बाढीको सतह उच्च रहेका कारण उनीहरू बाटोमै रोकिएका छन्। नेपाली सेनासँग समन्वय गरी हेलिकप्टरमार्फत उद्धार गर्ने प्रयास भइरहेको जिल्ला प्रशासन कार्यालयले जनाएको छ। स्थानीय प्रशासनले अहिलेसम्मको क्षतिको पूर्ण विवरण संकलन गरिरहेको बताएको छ ।
