अमेरिका र इजरायलद्धारा इरानमाथि हवाई आक्रमण

काठमाडौं : इजरायल र अमेरिकाले शनिबार बिहान इरानमाथि संयुक्त हवाई आक्रमण गरेका छन्। इजरायली रक्षा मन्त्री इजरेल काटेज र दुई अमेरिकी अधिकारीलाई उद्धृत गर्दै अन्तर्राष्ट्रिय सञ्चारमाध्यमहरूले उक्त जानकारी दिएका हुन्।

आक्रमणसँगै सम्भावित इरानी प्रतिशोधको आशंकामा इजरायलले देशभर आपतकाल घोषणा गरेको छ। इजरायलको गृह मोर्चा कमान्डले सर्वसाधारणलाई अत्यावश्यक कामबाहेकका गतिविधि नगर्न निर्देशन दिएको छ। नयाँ प्रतिबन्धअनुसार सार्वजनिक जमघट, कार्यालय तथा विद्यालय सञ्चालनमा रोक लगाइएको छ। तर इजरायलले ‘विशेष क्षेत्र’ भनेर परिभाषित गरेका केही क्षेत्रलाई भने अपवाद दिइएको जनाइएको छ।

इजरायली स्रोतलाई उद्धृत गर्दै एक अन्तर्राष्ट्रिय समाचार संस्थाले शनिबारको आक्रमण अमेरिकासँग समन्वय गरेर गरिएको जनाएको छ। यद्यपि, प्रारम्भिक चरणमा यो आक्रमण एकल रूपमा इजरायलले गरेको हो वा अमेरिकाले पनि प्रत्यक्ष सहभागिता जनाएको हो भन्ने स्पष्ट भइसकेको छैन। इजरायलले प्रहारका क्रममा इरानका दूरमारक क्षेप्यास्त्र र प्रक्षेपण यन्त्रलाई निशाना बनाएको जनाएको छ। ती क्षेप्यास्त्रलाई इजरायलले गम्भीर सुरक्षा चुनौतीका रूपमा हेर्दै आएको थियो।

यसअघि सन् २०२५ जुनमा अमेरिकी राष्ट्रपति डोनल्ड ट्रम्पको निर्देशनमा अमेरिकी युद्धक विमानले इरानभित्रका तीन आणविक केन्द्रमा शक्तिशाली बम खसालेका थिए। करिब आधा शताब्दीदेखि जारी इस्लामिक गणतन्त्र इरानसँगको वैमनस्यबीच इरानी भूमिमा प्रत्यक्ष आक्रमणको अनुमति दिने ट्रम्प पहिलो अमेरिकी राष्ट्रपति बनेका थिए।

शनिबारको आक्रमणपछि इजरायलले आफ्नो हवाई क्षेत्र पनि बन्द गरेको यातायात मन्त्रालयले जनाएको छ। पछिल्ला घटनाक्रमले मध्यपूर्व क्षेत्रमा तनाव थप चुलिने संकेत देखिएको छ।