प्रतिनिधिसभाबाट आर्थिक विधेयक बहुमतले पारित

काठमाडौं :  आगामी आर्थिक वर्षको बजेट कार्यान्वयनलाई प्रभावकारी बनाउने सरकारी प्रतिबद्धताबीच प्रतिनिधिसभाले आर्थिक विधेयक, २०८३ बहुमतले पारित गरेको छ। आइतबार बसेको प्रतिनिधिसभा बैठकले अर्थमन्त्री डा. स्वर्णिम वाग्लेले प्रस्तुत गरेको विधेयक स्वीकृत गरेको हो।

विधेयकमाथिको छलफलमा उठेका प्रश्नको जवाफ दिँदै अर्थमन्त्री वाग्लेले आगामी आर्थिक वर्षदेखि पूँजीगत खर्चको कमजोर अवस्थालाई सुधार गर्ने दाबी गरे। सरकारले लगाएको करले न्यून आय भएका नागरिकलाई अतिरिक्त भार नपार्ने उनको भनाइ थियो।

उनले अर्थतन्त्र सुधारका लागि ल्याइएको बजेटको सकारात्मक प्रभाव आगामी वर्षदेखि देखिन थाल्ने विश्वास व्यक्त गरे। भ्याटको बहुदर प्रणालीबारे अध्ययन गर्न उच्चस्तरीय समिति गठन गरिने र त्यसको सिफारिसका आधारमा आवश्यक निर्णय लिइने जानकारी पनि उनले दिए। राइड सेयरिङ व्यवसायलाई करको दायरामा ल्याउन आवश्यक नीति तयार पारिने उनले बताए। विधेयकमाथि दर्ता भएका केही संशोधन फिर्ता भएका छन् भने अधिकांश अस्वीकृत भएका छन्।