काठमाडौं : नबिल बैंकको मोबाइल बैंकिङ प्रणालीमा शनिबार बिहानदेखि प्राविधिक समस्या देखिएको छ। प्रणालीमा आएको अवरोधका कारण मोबाइल बैंकिङ सेवा प्रयोग गर्न खोज्ने ग्राहक प्रभावित भएका छन्।
सर्भरमा आएको प्राविधिक समस्याका कारण मोबाइल बैंकिङ सेवा सञ्चालनमा अवरोध भएको हो। समस्याको कारण पहिचान गरी सेवा यथाशीघ्र सुचारु गर्न प्राविधिक टोलीले काम गरिरहेको बैंकले जनाएको छ।
मोबाइल बैंकिङमार्फत रकम स्थानान्तरण, बिल भुक्तानी तथा अन्य डिजिटल कारोबार गर्न नपाएको भन्दै केही ग्राहकले सामाजिक सञ्जालमार्फत गुनासो गरेका छन्। सेवा अवरुद्ध हुँदा दैनिक डिजिटल कारोबारमा निर्भर ग्राहकलाई असुविधा भएको छ।
बैंकले ग्राहकलाई परेको असुविधाप्रति क्षमायाचना गर्दै समस्या समाधानका लागि आवश्यक प्राविधिक प्रयास भइरहेको जनाएको छ। सेवा पूर्ण रूपमा कहिलेसम्म सुचारु हुन्छ भन्नेबारे भने बैंकले समयसीमा सार्वजनिक गरेको छैन।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |