काठमाडौँ : हमासले इजरायलमा आक्रमण गर्दा बन्धक बनेका कञ्चनपुरका विद्यार्थी विपिन जोशीको परिवारले उनको मुक्तिका लागि इजरायली राष्ट्रपति आइज्याक हर्जोगसँग प्रत्यक्ष भेट गरी पहल गर्न आग्रह गरेको छ।
इजरायलस्थित नेपाली राजदूत धनप्रसाद पण्डितको पहलमा आइतबार जोशीकी आमा पद्मा र बहिनी पुष्पाले राष्ट्रपति हर्जोगसँग भेट गरेका हुन्। भेटका क्रममा आमाले छोराको सकुशल रिहाइका लागि मानवीय पहल गर्न आग्रह गरिन्। त्यस्तै, बहिनी पुष्पाले दाइ विद्यार्थीका रूपमा इजरायल पुगेको र कुनै दोष नरहेको भन्दै हमासको कब्जाबाट तत्काल मुक्त गराउन अपिल गरिन्।
विपिन जोशी गत वर्ष कृषि शिक्षार्थीका रूपमा इजरायल गएका थिए। तर, हमासले आक्रमण गर्दा उनी अन्य केही विदेशी विद्यार्थीहरूसँगै बेपत्ता भएका थिए। लामो समयसम्म खोजी नतिजा नआएपछि परिवारले अन्तर्राष्ट्रिय समुदायमार्फत पहलको आग्रह गर्दै आएको छ।
राष्ट्रपति हर्जोगसँगको भेटलाई परिवारले आशाको किरणका रूपमा लिएको छ। नेपाल सरकारले पनि जोशीको सुरक्षित उद्धारका लागि इजरायल सरकारसँग निरन्तर सम्पर्कमा रहेको बताइएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |